Arnaq Narsarsuarmi toqusoq: 18-inik ukiulik tigummigallarneqartoq

Angut inuusuttoq arfininngormat unnukkut tigummigallarneqalerpoq, arnamillu toqutsisimasutut allamillu toqutseriarsimasutut unnerluutigineqarluni.
Arnaq arfininngormat ullaassakkut toquvoq. Angut inuusuttoq toqutsisimasutut arfininngormat unnukkut tigummigallarneqalerpoq. Assi: Toqqorsivimmit. Assi © : KNR
marsip 15-at 2020 16:16
Nutserisoq Ivik Kristiansen

Politiit Narsarsuarmi arfininngormat ullaassakkut angerlarsimaffimmut ornigupput.

Tassani arnat marluk nakuuserfigineqarsimapput ajoquserujussuarlutillu. Taakkunani arnaq 62-inik ukiulik toquvoq.

Angut inuusuttoq inatsit tunngaviusoq naapertorlugu arfininngormat unnukkut killisiorneqarpoq, unnerluutigineqarlunilu.

Angutip 18-inik ukiullip pisuunerluni pisuunnginnerluniluunniit oqaaseqarfigerusunngilaa. Tamatuma kingorna tigummigallarneqarnissaa eqqartuussisup aalajangerpaa.

Kalaallit Nunaata politiivi taama paasissutissiipput.

Maannakkuugallartoq apriilip ulluisa arfineq-pingajuata tungaanut ulluni 26-ni tigummigallarneqassaaq.

Toqutsisimasutut toqutseriarsimasutullu unnerluutigineqartoq

Arnamik 45-nik ukiulimmik toqutseriartutut aamma unnerluutigineqarpoq.

45-nik ukiulik pisup kingorna isumannarunnaarsinneqarpoq, Qaqortullu napparsimmavianut unitsitaalluni.

Angut arnanut marlunnut qanoq atassuteqarnersoq politiini pigaartup paasissutissiissutigerusunngilaa, arfininngormallu ullaassakkut pisoq annerusumik oqaaseqarfigerusunnagu.

AAMMA ATUARUK Narsarsuarmi angut inuusuttoq arnamik 62-inik ukiulimmik toqutsisimasutut pasineqartoq tigusaasoq

Tunngaviusumik inatsit naapertorlugu matoqqasumik killisiuisoqartoq, sulilu paasiniaasoqartoq pigaartup innersuussutigai.

Politiit nakorsamit toqusunik misissuisartumit pinerluttuliortoqarsimaneranillu misissuisartunit marlunnit naalagaaffiup politiivineersunit misissuinermut ikiorneqassapput.