Nuuk Couture nutaamik pisortartaarpoq

- Nuuk Couture ilisimalluarpaa. Nuuk Couturemi pisortaasimasoq Louise Lynge Berthelsen pisortanngortoq nutaaq pillugu taama allappoq.

Louise Lynge Berthelsen Nuuk Couturemi ukiut qulingajaat pisortaareerluni Arctic Circle Businessimi marsip aallaqqaataani pisortanngulerpoq.

AAMMA ATUARUK Nuummi atisanik ilusilersuisartoq Arctic Circle Businessimi pisortanngulersoq

- Taava imaappoq uanga Nuuk-Couturemik ingerlatsissanngilanga. Imaanngilaq matulersoq, imaluunniit ajortoq, illuatungaanilli isumaqarluni, Louise Lynge Berthelsen KNR-imut ukioq aallartilaartoq oqarpoq.

Nivé Lynge Petersen kinaana?
- Nivé Lynge Petersen logistikki pillugu ilinniagaqarpoq.
- Nivé Lynge Petersen 36-nik ukioqarpoq, Nuummilu peroriartorluni.
- Air Stop Cafemi Nuup mittarfianiittumi piginnittuuvoq.
- Nivé Lynge Petersen Louise Lynge Berthelsenilu qatanngutigiipput.

Nivé peqataajuarsimavoq

Arctic Circle Business peqatigiiffiuvoq namminersortoq, peqatigiiffiup inuussutissarsiuteqartut anguniagaannik pitsanngorsaaniartuuvoq.

Louise Lynge Berthelsen atisanik ilusilersuisartunngorniarluni ilinniarlermalli Nivé Lynge Petersen eqqaaniittuarsimavoq.

AAMMA ATUARUK Nuuk Couture Copenhagen Fashion Weekimut peqataarngaartoq

- Nuuk Couture 2010-imi ammarmalli Nivé peqataavoq. Amerlasuutigut tapersersornikuuaanga, soorlu ilusilersuineq ingerlatsinerlu eqqarsaatigalugit, Louise Lynge Berthelsen oqarpoq.

Nuuk Couture nunatsinnut, Danmarkimut, Norgemut, Canadamut USA-mullu nioqquteqartarpoq.

Nuuk Couturep siulersuisuini Louise Lynge Berthelsen siulittaasuuginnassaaq.