Partii ikorfartortaasup nunatsinni uuliasiorniartoqarnera isornartorsioraa

Enhedslistenip Greenpeace Nordenillu nunatta uuliasiornissamut aningaasaliisussarsiortuarsinnarnera isornartorsiorpaat. Kalaallit Nunaat nutaanik isertitassarsiortariaqaraluartoq, kajumissaarutigaat.
Naalakkersuisut isumaqarput, nunatsinni uuliasiorneq gassisiornerlu isertitaqaatigineqarluarsinnaajuarsinnartut. Danmarkimili Enhedslistenimeersut isumaqarput, tamanna kukkuluttornerussasoq.
februaarip 14-at 2020 11:23
Nutserisoq Hanne Petersen

Naqqiut: Kim Kielsen nunatsinni uuliasiornermik gassisiornermillu nittarsaassiartorluni USA-meereerluni Tuluit Nunaanniissimasoq radioaviisimi siusinnerusukkut oqarpugut. Kim Kielsenili kisimi USA-miippoq, atorfilittallu Tuluit Nunaanniillutik.

Naalakkersuisut siulittaasuata, Kim Kielsenip nunatsinni uuliasiornermik gassisiornermillu nittarsaassiartorluni USA-miileruttornerani, Folketingimi Enhedslistemeersut isornartorsiuipput. Danmarkimi nutaarsiassaqartitsivik, DR, taama allappoq. 

Enhedslistenip Kalaallit Nunaat pillugu ataatsimiititaliami ilaasortaatitaata, Søren Søndergaardip, uuliasiornissamut gassisiornissamullu piffissaajunnaareersoraa.

- Kalaallit Nunaanni politikerit namminneq aalajangissapput. Kalaallit Nunaatali siunissaata silarsuarmik mingutsitseqataasunik tunngavilerneqarnissaa isumatusaarnerunngilluinnarnerusoraarput, Søren Søndergaard DR-imut oqarpoq.

AAMMA ATUARUK Periusissiaq nutaaq nunatsinni uuliasiornissamut soqutiginnilersitseqqissasoq

Danmarkip naalakkersuisui immami Danmarkip Tuluit Nunaallu akornanniittumi, Nordsøenimi, uuliaqarfippaaluit tunineqarnissaannut aalajangiinissaminnik kinguartitsigallarneranni, Naalakkersuisut, ilaatigut ingerlatseqatigiiffinnut akileraarutikinnerulersitsinissamik neqeroornermikkut, uuliasioqatigiit nunatsinni uuliasiornissaannik ussassaarpaat.

Enhedslisemeersulli, Søren Søndergaardip, Issittumi uuliakoortoqassagaluarpat ajunaarnersuaqaratarsinnaanera aarleqqutigisupilussuuaa. Taamaammat Naalakkersuisut nutaanik isertitassarsiortariaqarsorai.

Kielsen: Nunatta uuliasiorneq nukiillu ataavartut isertitaqaatigisinnaavai

Nunattalu nunatsinni uuliasiornissamut aningaasaliisussarsiornera isorigini, Greenpeace Nordenimi qullersap, Mads Flarup Christensen, DR-imut oqarpoq.

AAMMA ATUARUK Kielsen uuliasiornermut soqutiginnilersitseqqikkusuppoq - iluatsissimanngitsoq akerlilerpaa

Nunarpulli nukinnik ataavartuneersunik nukissiorfinnik, soorlu erngup nukinganik nukissiorfinnik, pilersitsinissanut aningaasaliisimasoq, Naalakkersuisut siulittaasuata erseqqissaatigaa.

Uuliali gassilu nunarsuarmi pisariaqartinneqartuarsinnarput, tamannalu nunatta iluaqutigisinnaavaa, Kim Kielsen KNR-imut oqarpoq.

- Nutaanik aningaasanik isaatitsinissatsinnut ujartuisariaqarpugut, taavalu tassani nunatta pisuussutai uumaatsut aamma atorluarneqarnissaat aqqutissiuuttariaqarpavut, Naalakkersuisut siulittaasuat Kim Kielsen oqarpoq.