Nunatsinni innuttaasut amerleriartut
Kalaallit Nunaanni innuttaasut 2018-miilli amerliartornerat ingerlaqqippoq, tassami Filippiinerit Thailandimiullu nunatsinnut tikittartut amerleriarsimammata. Naatsorseqqissaartarfiup kisitsit saqqummiussaani kingullermi tamanna takuneqarsinnaavoq.
Nunatsinni innuttaasut 2019-ip ingerlanerani 89-inik amerleriarput, ukiup siuliani 115-nik amerleriarlutik.
Nunatsinni najugallit 2020-mi januarip aallaqqaataani 56.081-iupput.
AAMMA ATUARUK Nuummi innuttaasut 18.000-inngortut
Illoqarfiit pingaarnersaanni Nuummi najugallit 2019-imi amerleriarujussuarput, 342-nimmi amerleriarsimammata. Tassalu nunatsinni innuttaasut 32,7 procentii Nuummi najugaqarput, kisitsinngorlugit 18.326-it.
Kommune Kujallermi aamma Qeqqata Kommuniani innuttaasut nikippiarsimanngillat, Kommune Qeqertalimmili innuttaasut ikileriarput, kommunimilu tassani innuttaasut allanut sanilliullugit taamalillutik ikinnerpaanngoqqillutik.
Nunani allani innuttaassusillit amerleriartitsisut
Nunani allani innuttaassusillit ukiuni kingullerni 12 procentinik amerleriarput. Nunani allani innuttaassusillit nunatsinni najugallit katillugit 1.246-pput. Pingaartumik Filippinerit, taakkua 373-iullutik Thailandiminngaanneersullu 208-ullutik.
Nunani taakkunani innuttaassusillit nunatsinni najugallit ukioq ataaseq matuma siornarmit katillugit 109-nik amerleriarput, nunanilu allani innuttaassusilli nunatsinni najugallit maanna 47 procenteraat.
AAMMA ATUARUK Filippinerit nunatsinniittut amerlanerpaat tullerileraat
