Kielsen uuliasiornermut soqutiginnilersitseqqikkusuppoq - iluatsissimanngitsoq akerlilerpaa

Nunatsinni uuliasiornissamut 2010-kkut naajartorneranni soqutigikkunnaariartortoqarpoq. Naalakkersuisullu soqutiginnilerseqqikkusupput.
Assi © : KNR
februaarip 13-at 2020 06:26

Uuliasiortitseqatigiiffiit nunatsinni uuliasiornissamut 2014-imit soqutiginnikkunnaariartorput.

Naalakkersuisulli nunatta karsianut isertitsiffiusut amerlisinniarlugit maanna soqutiginnilersitseqqinniarput.

Uuliamik kuserninnguamilluunniit suli tunisisoqanngikkaluartoq, nunatsinni uuliasiorneq iluatsitsiffiusimannginnermik oqarneq Kim Kielsenip akerlilerpaa.

- Misissueqqaarnerit qarmaanikuusimavugut, tassa taamanikkut pilersaarut aallarteqqaarmalli. Misissueqqaarnerit qillerinerillu ilaat pisimapput, allaat 14-imi qillerisoqarsimavoq, aamma paasinarsisimavoq uuliat assigiinngitsut tallimat nassaarineqarsimallutik. Aamma gassimik nassaartoqarnikuuvoq. Taamaammat iluatsitsisoqarsimavoq, Kim Kielsen Qanoruumut oqarpoq. Qanorli uuliaqartiginersoq nalullugu nassuerutigaa.

AAMMA ATUARUK Periusissiaq nutaaq nunatsinni uuliasiornissamut soqutiginnilersitseqqissasoq

Nunatsinni uuliasiorniarnermut 2010-kkut aallartinneranni soqutiginnittoqarnerpaajuneranut innersuussivoq. Tassani uuliasioqatitseqatigiiffiit nunarsuarmi annersaasa ilaat, soorlu ExxonMobil, Chevron, Eni Shellilu nunatsinni uuliasiornissamut suliaqarput.

Cairn Energyllu soqutiginninnera kinguneqartinneqarnerpaajuvoq. Nunattali kitaani qillerisaraluarluni uuliasiortitseqatigiiffik Skotlandiminngaanneertoq iluatsitsinngilaq, milliardillu koruuninik arlalinnik aningaasaleereerluni nunatsinni uuliasiornerminik taamaatitsivoq.

Cairn Energylli aallartikkami iluatsitsinngitsoorsinnaalluni nalunngikkaa Kim Kielsen oqarpoq.

- Isaasalerlugu ”lottorput”, allatuulli nassaarsimasuuppata aamma annertuupilussuarmik isaatitsiffissatut periarfissanik pissarsisimassagaluarput. Kisianni paasissutissarpassuit katersorsimavaat aamma ingerlatseqatigiiffiit taama atsigisut misileraanissamut tunngatillugu aningaasaliisarput. "Iluatsitsissappat iluatsitsissuugut, iluatsitsinngikkutta allatut ajornaqaaq, taava allanik ujarlerniarta", Kim Kielsen oqarpoq.

AAMMA ATUARUK Cairn Nunatsinni unikkallarpoq

Uuliasiortitseqatigiiffiilli allat Cairn Energyp iluatsitsinnginnera maluginiarpaat. Nunatsinnilu uuliasiorneq akisummat, uuliallu nunarsuarmi akia appasimmat, nunatsinni uuliasiornissamut soqutiginnittut ikiliartorput. Misissuinissamut qalluinissamullu akuersissutit tamarmik 2014-imit utertinneqarsimanngikkunik utertinnissaat suliarineqartut, Naalakkersuisut uuliasiornermut periusissiaanni nutaami atuarneqarsinnaavoq.

Periusissiaq ukioq manna jannuaarip naanerani akuerineqarpoq, nunatsinnilu uuliasiornissamut gassisiornissamullu soqutiginnilersitseqqinneq ukiunilu tulliuttuni sisamani immikkut anguniarneqarluni.

Ilaatigut pisinnaatitsissuteqarfinnik nutaanik ammaanikkut, uuliasiortitseqatigiiffiinnut pitsaanerusunik pisinnaatitsissutinut politikkimik atuutilersitsinikkut uuliasiortitseqatigiiffinnullu iliuuseqarluni nittarsaassinikkut soqutiginnilersitseqqinniarput.

AAMMA ATUARUK Eqqartuussissulerisoq: Royalties inatsisitigut periarfissaapput isumassarsiarli pitsaasuunngilaq

Naalakkersuisut uuliasiortitseqatigiiffinnut akileraarutitigut piumasaqaatit aamma sakkukilliniarpaat. Maanna akileraaruseriaaseq uuliasiortitseqatigiiffinnut orniginanngitsoq Kim Kielsen oqarpoq.

- Orniginartunngortissagutsigu taava iliuuseqarsimavugut, taavalu tassani nunat allat qanoruna taamatut tigusaqartartut takullutigit, Kim Kielsen oqarpoq, aalisarnerullu saniatigut nunatta karsianut isertitsiffiusussanik allanik ujaasisariaqartugut oqarluni.

- Nutaanik aningaasanik isaatitsinissatsinnut ujartuisariaqarpugut, taavalu tassani nunatta pisuussutai uumaatsut aamma atorluarneqarnissaat aqqutissiuuttariaqarpavut, Naalakkersuisut siulittaasuat Kim Kielsen oqarpoq.