Asiliaatitit piariikkit: Sisimiuni asimi aasakkut pisuttuartitsisoqartalissasoq
Arctic Hiking Festivalimik taaguuserlugu asimi pisuttuartitsineq siulleq aasaru sapaatip-akunnerani 30-mi pisussatut pilersaarutigineqarpoq.
Ullut sisamat ingerlaneranni pisuttuarnerit assigiinngitsut 24-t peqataaffigineqarsinnaassapput, piujuaannartitsinerlu, nuannersumillu misigisaqartitsillunilu kammattaarfissaq festivalimi qitiussapput.
- Pinngortitaq kusanartoq tuneqqissavarput atorluarlugu paaralugu, soorlu eqqagassat katersuutigisinnaavagut assigisaanillu pisinnaalluta, Sisse Bang, Arctic Hiking Festivalimik pilersitseqataasoq oqarpoq.
Hiking nuannarineqarluartoq
Festivali nutaaq takornariat nuannarilluariligaannut tulluartuusoq, Jesper Schrøderip, Destination Arctic Circlep aqutsisuata oqaatigaa:
- Pisuttuarnerit soqutigineqarnerat annertuserujussuaqqavoq, takornariallu akisuallaanngitsumik angalasut soqutiginninnerusarlutik, ullumikkut angalasut kikkulluunniit pisuttuarneq soqutigisaraat. Immikkullu maluginiarparput Arctic Circle Trailip soqutigineqarnera sumiiffigisatsinni annertuseqqasoq, Jesper Schrøder oqarpoq.
Arctic Circle Race Arctic Soundsilu Sisimiuni pisartut tusaamaneqarluarput, asimilu pisuttuartitsinermik festivalip ukiumoortumik aaqqissuunneqartalernissaa pilersaarutaalluni.
Kalaallit pisuttuarnermik soqutigisallit "Arctic Hikers", Arctic Circle Business Destination Arctic Circlelu suleqatigalugit Hiking Festivalimik piviusunngortitserusuttuupput.