Bernie Sanders demokraatit New Hampshiremi qinersineranni ajugaasoq

USA-mi demokraatit præsidentinngorniunneq sioqqullugu sassartitassaminnik New Hampshiremi marlunngornermi qinersimmata senatori Bernie Sanders ajugaavoq. USA-mi tv-qarfiit arlallit tamanna nalunaarutigaat.

- Ajugaaneq una Donald Trumpip præsidentiujunnaarnissaanik aallarniivoq, Sanders ajugaasutut tv-qarfinnit NBC-mit ABC-miillu suaarutigineqareersorlu tapersersortiminut oqaluginarnermini ilaatigut oqarpoq.

Bernie Sanders, 38-nik ukiulimmut, Pete Buttigiegimut, ajugaaqqarpoq. Buttigiegip Sanders Iowami qinersinermi ajugaaffigaa, kinalu demokraatit sinnerlugit præsidentimut ukiaru qinersinermi sassartitaassanersoq suli aalajangerneqanngilaq, naalagaaffinnimi allani upernaaru qinerseqattaaqqaartussaapput.

Biden angusarissaarpallaanngitsoq

78-inik ukiulik, Bernie Sanders, demokraatit iluanni saamerlernut ilaavoq, Pete Buttigiegilu demokraatit iluanni ingasattajaartuunani.

USA-mi præsidentimut tullersortaasimasoq, Joe Biden, New Hampshiremi normu 5-inngorpoq.

AAMMA ATUARUK Pete Buttigiegip Sanders Iowami ajugaaqqarfigaa

New Hampshiremi marlunngornermi qinersisoqarnissaa sioqqullugu inunnik isumasiuinerit takutippaat, Joe Biden unammillertiminut naleqqiullugu angusarissaarpallaarnavianngitsoq. Biden Iowami aamma angusarissaarpallaanngilaq.