Peqatigiiffik Kalaallit Meerartaat kalaallinut Danmarkimi efterskolertunut Allu-mik taasamik neqerooruteqartarpoq.

Kalaallit efterskolertut 17 procentii unitsitsiinnartartut

Kalaallit efterskolertut atuarnerminnik unitsitsiinnartarnerat pillugu nalunaarusiap inuusuttunit 300-t missaanniittunit 50-it unitsitsiinnartartut takutippaa. Kalaallit unitsitsiinnartartut amerlanerpaarpaat niviarsiaraapput.

Ukioq atuarfiusoq 2018/2019-imi nunatsinniit 291-it Danmarkimut efterskoleriartorput. Taakkunannga 142-t nukappiaraapput 149-llu niviarsiaraallutik. Efterskolertunit 50-it atuarnerminnik unitsitsiinnarput, taakkunanngalu 34-t niviarsiaraapput. Peqatigiiffik Kalaallit Meerartaat nalunaarusiamik suliaqartuuvoq. Unitsitsiinnartarnermi atugarliorneq angerlarsernerlu pissutaanerusartut nalunaarusiami uparuarneqarpoq.

- Taakku (niviarsiaqqat aaqq.) atuarnerminnik unitsitsiinnarnissaat aarlerinarnerusarpoq, nukappiaqqat unitsitsiinnartarnerannit marloriaammit aarlerinarnerulluni. Niviarsiaqqat amerlasuut tarnikkut ajornartorsiuteqarlutik efterskolernerminnik unitsitsiinnartartut amerlangaatsiarput, Peqatigiiffik Kalaallit Meerartaat tusagassiuutinut nalunaarummi allappoq.

  • Peqatigiiffik Kalaallit Meerartaat 1924-mi pilersinneqarpoq.
  • Peqatigiiffik taamani meeqqanut sakialluuteqartunut tunnganerulluni.
  • Peqatigiiffilli piffissap ingerlanerani ineriartulerpoq susassaqarfiillu siammasinnerusut ilaatigut kalaallit meerartaat inuusuttullu meeraanerat toqqissisimanerallu pillugit suliniuteqartalerluni.

Unitsitsiinnartarnerannut anisitaaneq, atugarliorneq, tarnikkut ajornartorsiuteqarneq angerlarsernerlu pissutaasinnaapput. Niviarsiaqqallu atuarnerminnit anisitaasartut ukiunit ukiuni amerliartorsimasut nalunaarummi erseqqissaatigineqarpoq.

Peqatigiiffik naapertorlugu kalaallit atuartut kalaaleqatiminnik ataasiinnarmik efterskoleqateqaraangamik kisimiikkaangamillu unitsitsiinnarnissaat aarlerinarnerusarpoq.

Efterskoleni kalaallit atuartut marlunnit amerlanerugaangata unitsitsiinnartartut ikinnerusarput.

Suliap ingerlaqqinnissaanut paasisaq pingaarutilik

Nalunaarusiaq unitsitsiinnartartut pissutaannik erseqqissaasoq Namminersorlutik Oqartussani Ilinniartitaanermut Aqutsisoqarfik sinnerlugu Peqatigiiffimmit Kalaallit Meerartaannit suliarineqarpoq. Ilinniartitaanermut Aqutsisoqarfiup pisortaata tulliata oqarnera naapertorlugu nalunaarusiaq Namminersorlutik Oqartussat tungaanniit unitsitsiinnartartut ikilisinnissaanut suliniuteqarnermut iluaqutaassaaq.

- Nalunaarusiami inuusuttut atuarnerminnik unitsitsiinnartarnerannut pissutaasut ilaannik kikkullu ilimanaateqarnerpaajunerannik pingaaruteqartunik paasisimasaqalerpugut. Suliniutit tapersiissutaasinnaasut amerlanerusut eqqarsaatigalugit ilisimalikkat pingaaruteqartuupput, Ilinniartitaanermut Aqutsisoqarfiup pisortaata tullia, Kaali Olsen tusagassiuutinut nalunaarummi allappoq.

Efterskoleforeningimit, Kalaallit Illuinit, Peqatigiiffik Kalaallit Meerartaannit kiisalu Ilinniartitaanermut Aqutsisoqarfimmit sinniisunik efterskolimik unitsitsiinnartartut ikilisinniarnissaannut alloriarnissap tullianik oqallisiginninnissamut nalunaarusiap aatsaat saqqummersinneqareernerani aggersaasoqarpoq.

Peqatigiiffik Kalaallit Meerartaat kalaallinut Danmarkimi efterskolertunut Allu-mik taasamik neqerooruteqartarpoq.

- Allumi inuusuttut kisimiittutut misigisimasut imaluunniit qallunaat efterskoleni kulturiannik sungiussinngitsut ataatsimooqatigiilersittarpagut. Kalaallinik inuusuttunik allanik naapitaqarnikkut toqqissisimalerneq ataatsimooqatigiinnerlu efterskolernermik naammassinninnissamut nukissaqalersitsisarput, Peqatigiiffik Kalaallit Meerartaat tusagassiuutinut nalunaarummi allappoq.

Kommentarer



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Live flyinformation ank./afg.

TTV s 350 Aktuel TV oversigt

TTV s 610 Aktuel Radio oversigt