Peqquserluttuliorluni tusind kroniliat pillugit inuit marluk pasineqartut

Suliaq qanoq ingerlateqqineqassanersoq inatsisilerituunit maanna nalilersorneqarpoq.  00:00:19

Peqquserluttumik aningaasaliat tusind koruunit sisamat ukiortaap kingorna politiinut kalerriutigineqarput.

Peqquserluttuliorluni aningaasaliaq siulleq politiinut januaarip ulluisa 19-anni kalerriutaavoq. Tullii marluk januaarip ulluisa 21-anni, kingullerlu februaarip ulluisa tallimaanni nalunaarutigineqarluni.

AAMMA ATUARUK Politiit: 1000 koruunit peqquserluusiat Nuummi ingerlaarput

Inuit pasineqartut marluk ilisarisimaqatigiittuunersut politiit maannakkut oqaatigisinnaanngilaat.

- Imminnut ilisarisimasuunersut oqaatigisinnaanngilara, pinerluttoqarsimaneranilli paasiniaanermi apeqqut tamanna ilanngunneqassaaq. Suliaq suli suliarineqarpoq nalilersorneqarlunilu, Søren Bendtsen Kalaallit Nunaanni Politiini pigaartut pisortaat taama oqarpoq.

Peqquserluttuliorluni aningaasaliat ilisariuminartuupput, talerpiata ataani isuani qorsummik meqqeqaramik, leftovercurrency.com allaqqasumik.

Akiliisitsineq imaluunniit eqqartuussivimmi 

Peqquserluttuliorluni aningaasaliaq ataaseq neriniartarfimmi, marluk Nuummi pisiniarfeqarfisssuarmik ataasiarlunilu pisiniarfimmi allami akiliutigineqarniarsimagaluartut, politiineersoq oqarpoq.

- Suliaq qanoq ilungersunartiginersoq inatsisitigut maanna nalilersuisoqassaaq, tassa Akiliisitsisoqassanersoq imaluunniit eqqartuussivimmi aalajangiisoqassanersoq. Pasineqartut tunuliaqutaat qanoq ittuunersut apeqqutaavoq, taakkua allamik pinerluttuliorsimasutut pasineqassanersut uteqqiattumilluunniit pinerluttartuunersut, Søren Bendtsen oqarpoq. Peqquserluttuliorluni tusinde koruuniliat politiinit arsaarinnissutigineqarput, taakkualu neriupput peqquserluttuliorluni aningaasaliat tamaaasa pissarsiarisimassallugit.

- Peqquserluttuliorluni aningaasaliat pitsaassusaat printerilu ataaseq atorlugu assilineqarsimanersut misissussavagut, Søren Bendtsen oqarpoq.