Illoqarfiit pingaarnersaat pingasunik nutaanik dieselitortunik bussitaartoq
Nuup Bussii 82-inik ilaasoqarsinnaasunik pingasunik nutaavinnik bussiutitaarput.
Bussit ukiunut pingasunut tulliuttunut inniminnerneqarnikut arfineq-pingasut ilagaat.
Nuup Bussii Kommuneqarfik Sermersuumi kiffartuussinissamik isumaqatigiissuteqarput, tassanilu bussit agguaqatigiissillugu ukiunik aqqaneq-marlunnik pisoqaassuseqarnissaat bussillu ukiunik 18-inik pisoqaatiginnginnissaat piumasaqaataavoq.
AAMMA ATUARUK Biilitit ima mingutsitsitigaat
Taamaammat nutaanut aningaasaliissuteqarnissaq pisariaqartoq, Nuup Bussiini pisortaq, Mogens Nathansen nassuiaavoq.
- Bussit nutaat ilaasartutsinnut kiffartuussinermik pitsanngorsaassapput avatangiisinullu pitsaanerullutik, pissutigalugu bussinut pisoqqanut maannakkut atukkatsinnut, dieselitortunut sanilliullugit nutaat pujoorfiisa minguiaasui EU-mit akuerisaapput, pisortaq oqarpoq.
Bussit hybridit issittumi atorsinnaanngitsut
Bussilli suli dieselitortuupput, tamatumanilu pissutissaqarluartoq pisortaq nassuiaavoq. Bussit issittumi ukiukkut avatangiisinut mingutsitsinnginnerusut tassa hybridit 2014-imit 2016-imut miseraatigineqaraluarput. Tamannali iluatsippallaanngitsoq pisortaq oqarpoq.
- Allaanngilaq soorlu nillataartitsivik ingerlaartoq. Bussit ilaasartunut aquttumullu nillerpallaarujussuarput. Tamatuma saniatigut qummukajaakkut motoria artorsalertarpoq, akunnermullu 25 kilometerit missaannaanik ingerlalluni, Mogens Nathansen oqarpoq.
AAMMA ATUARUK Umiarsuit takornariartaatit Nuummi ikuallaaviup ukiumi ataatsimi ikuallaaneratut mingutsitsitigisartut
Bussit nutaat issittumut tulluarsagaapput saneraatigut natitaanilu immikkut oqorsagaallutik, taavalu silataanni matut ammaraangata nammineq ikittartunik qulleqarlutik. Pisortallu oqarnera naapertorlugu bussit hybridiusut maannakkut pisaarineqartunit, bussinit dieselitortunit 1,8 millionit koruunit missaannik akeqartunit marloriaatingajammik akeqarput, aningaasallu nalinganut tulluarnatik.
- Bussinik nunatsinni ilaasartunut biilertartunullu ajoqutaanngitsunik, anorimut silamullu tulluartunik peqalernissaanut teknologiip ineriartortinneqarnera utaqqissavarput, Mogens Nathansen oqarpoq.
