Nunat tallimat ajunaartunut qanigisaasut taarsiivigitinnissaat piumasarigaat

Ajunaartunut qanigisaasut taarsiivigitissapput. Sverige, Canada, Ukraine, Afghanistan aamma Tuluit Nunaat nalunaarummini taama tusarliipput.
Timmisartup nakkartinneqarnerata iternga tikillugu ammasumillu misissorneqarnissaa, nunat pineqartut piumasaraat. Assi © : AFP/Ritzau Scanpix
Allattoq Ritzau
januaarip 17-at 2020 08:08
Nutserisoq Mads Lynge

Ukrainemiut timmisartuat Iranip illoqarfiisa pingaarnersaannit Teheranimit sapaatip-akunnerata siuliani qangattarsimatsiaannartoq, Iranimit kukkusoqarneratigut nakkartinneqarpoq, inuillu katillugit 176-it ajunaarlutik.

Ajunaartunut qanigisaasut Iranimit taarsiivigitinnissaat, Sverigep, Canadap,Ukrainep, Afghanistanip Tuluit Nunaata ataatsimoorullugu maanna piumasaraat.

Nutaarsiassaqartitsivik Reuters taama allaaserisaqarpoq.

Nunat tallimat taakku innuttaasuisa ilaat timmisartumut ilaapput.

Timmisartup nakkartinneqarnerata iternga tikillugu ammasumillu misissorneqarnissaa, nunat qulaani pineqartut piumasaraat.

Timmisartup nakkarneranut paasissutissat sukumiinerusut suli pissarsiarineqanngillat.

Iranimi illersornissaqarfiup timmisartoq nakkartikkaa, Iranimi aqutsisut nassuerutigereerpaat.

AAMMA ATUARUK Iran timmisartumik nakkartitsinermut akisussaasuunerartoq

Iranip Irakimi sakkutooqarfinnik marlunnik, nunat allat sakkutuuliiffigisaannik, qaartartunik igeriuttakkanik saassusseqqammereersorlu Ukrainemiut timmisartuat Iranimit nakkartinneqarpoq.

Iranimi sakkutuut naalagaasa qullersaata Qassem Soleimanip amerikamiunit toqutaammat Iran akiniaalluni sakkutooqarfinnik saassussivoq.

Iranimiut 82-it, canadamiut 63-it, ukrainemiut aqqanillit, svenskit qulit, afghanistanimiut sisamat, tyskit pingasut tuluillu pingasut timmisartoq nakkarmat ajunaarput.