Tennissertartoq orpippassuit ikuallannerannit pujoq pissutigalugu uniinnartoq

Australiami orpippassuit ikuallannerujussuat, ukiup ingerlanerani tenniserluni unammiuaarnerit annerit ilaannut Australian Openimut kinguneqartitsipput.

Unammisartut sungiusartut danskit nalunaaqutaat naapertorlugu marlunngornerup unnuaani sungiusarnertik Melbournep qanittuani ikuallattut pujuliornerujussuat pissutigalugu unitsiinnartariaqarsimavaat. Danskillu nalunaaqutaat naapertorlugu marlunngornermi ullaakkut unammisoqarnerani arnaq unammisartoq anngunniunnermini uniinnartariaqarsimavoq.

Sloveniameersoq Dalila Jakupovic schweizimiumut unammitilluni ajugaanissaa ilimanarseruttortoq tassanngaannartumik seeqqummerluni quersorujussualerpoq, anersaartorniarneralu ajornakusoortoq takuneqarsinnaalluni.

- Anersaartorsinnaajunnaariasaarpunga uppiinnarlungalu, Dalila Jakupovic oqartoq, sportingnews.com-ip allaaseraa.

- Pisussinnaajunnaarama uppiinnassasoralunga annilaanngagerujussuarpara.

AAMMA ATUARUK Australiami ikuallattoqarnerani inuit 240.000-it qimaguteqquneqartut

Jakupovic unamminerminnik unitsitsinnginnermini ingerlalluaraluarpoq.

Ikuallattut pujuat anersaartorfiisa aqqutaaniippallaalersimavoq, taamaalilluni quersuinnavilerluni, tamannalu pissutigalugu unammisarfimmit anillannissamut ikiorneqartariaqarsimalluni.

Tennisertartup kiannera pissutigalugu timimigulluunniit napparsimassutigisaminik ajornartorsiuteqannginnerarpoq.

- Astmaqanngilanga anersaartorniarninnillu ajornartorsiuteqanngisaannarsimallunga. Kiannera nuannerisorujussuusarpara, tennissertartoq oqarpoq, unammiuaarnernillu aaqqissuussisumut malunnarsaarluni oqaaseqarluni:

- Uagutsinnut peqqinnanngilaq. Uissuummerpunga. Pujornera pissutigalugu unamminissarput ilimaginngikkaluarpara, kisianni allamik aalajangigassaqanngilagut.

Unammisartut qassiiusut tusagassiorfiillu qisoq aamma qisuariaateqarfigaat, franskip unammisartup, Alize Cornetip pissutsinik ilorrisimaarinninngilluinnartunut ilaavoq.

AAMMA ATUARUK Uumasut milliardit Australiami orpippassuit ikuallanneranni toqusut

- Naleqqutinngilaq. Australian Open aamma Craig Tiley (unammiuaarnermi pisortaq aaqq.) iliuuseqaritsi. Ilumut taama pisoqartitsinissaa eqqarsaatigaasiuk, Alize Cornet twitterimini allappoq.

Taassuma assi australiamiut illoqarfissuata eqqaani pujorujussuup takuneqarsinnaanera innersuussissutigaa.

Kattuffiup Australian Openip twitterimi quppernermini allappaa unamminerit ingerlannissaannut aalajangiinissat kattuffiup timersortunut nakorsaat ingerlaarnernillu uuttortaasartut Bureau of Meteorologymeersut ilisimatuullu suleqatigineratigut aalajangerneqartassapput.

- Pisarnertut unammisartutta peqqissusaat isumannaassusaallu pingaarnerpaajutippagut, allagaani allassimavoq.

    /ritzau/