USA nunatsinni pisortatigoortumik sinniisussarsiortoq

'Kalaallit Nunaannut immikkut ilisimasaqartuuit?' Taamaappat amerikamiut Nuummi sinniisoqarfianni sulinissaq ilinnut tulluartuuvoq.

Amerikamiut Københavnimut aallartitaat Jobindex atorlugu atorfimmik nittarsaassilluni ”Kalaallit Nunaat pillugu immikkut ilisimasalimmik” USA-p politikkikkut, aningaasaqarnikkut, niuernikkut nunanullu allanut attaveqarneranik suliaqarsinnaasumik pissarsiorpoq.

Danmarkimi nunanut allanut tunngasunut ministereqarfiup USA-p Nuummi pisortatigoortumik allaffeqalernissaanut juullinngitsiarnerani akuersereerneratigut atorfimmut inuttassarsiuussisoqarpoq. Naalakkersuisuniillu kissaateqaqatigiittoqareerneratigut akuersissuteqartoqarpoq.

AAMMA ATUARUK Amerikansk konsulat i Nuuk godkendt

Oqaaseq 'konsulat' atorfiup saqqummersinneqarnerani atorneqanngilaq, atorfilli USA-p Danmarkimut aallartitaqarfiata ataaniippoq. Atorfilli sapaatip-akunneranut akunnerit 40-t suliffiussaaq, tassanilu: siunnersuinermut, misissuinermut, nunatsinni ineriartornermi alloraqataanermut amerikamiullu nunatsinni soqutigisaannik siuarsaanermut nalinginnaasumik suliassaqassalluni.

Tamanna politikerinut, inuussutissarsiornermik ingerlaqataqartunut aamma nunatsinni ilinniarfeqarfinni, ilisimatusarnermi, kultureqarnermillu suliaqartunik qanimut ilaatigut attaveqartassaaq. 

Suliffimmut atatillugu kalaallit nutaarsiassaqartitsivii aamma nakkutigineqarnissasut amerikamiullu atorfillit nunatsinnut tikeraarnerannik tapersorsuisarnissaq ilaapput.

AAMMA ATUARUK Amerikamiut arfineq marlunik sulisulimmik Nuummi sinniisoqalissapput

Danmarkimi tusagassiorfiup NORDJYSKE-p allaaserisaa naapertorlugu danskit nunanut allanut tunngasunut ministeriata, Jeppe Kofodip saqqummersinneqartoq takusimanagulu tusarsimanngilaa, tusagassiorfilli naapertorlugu taassuma atorfiup inuttalerneqarnissaa qilanaarutigaa:

- Periarfissanik pingaartitannik aamma Kalaallit Nunaannut pilersitsissaaq, soorlu aningaasaqarnikkut ineriartornermut, kulturikkut suleqatigiinnermut, ilinniartitaanermut, inuussutissarsiornikkut suleqatigiinnerunermut atatillugu. Taamaammat suleqatigiittoqalernissaa ajunngilluinnarsoraara. Danskit naalakkersuisuisa kalaallit naalakkersuisui tamatumanik taperserpaat, Jeppe Kofod oqarpoq.

USA-p nunanut allanut tunngasunut ministereqarfiata amerikamiut Nuummi 2020-p ingerlanerani allaffittaassaanni arfineq-marlunnik sulisoqarnissani naatsorsuutigigaa, nunat tamalaat akornanni nutaarsiassaqartitsiviup, AP-ip 2019-imi aggustimi allaaseraa.

Oqaatsitigut piginnaasaqarnissamut peqqissutsimullu piumasaqaatit

Suliffimmut atorfinitsinneqarnissamut eqqarsaatigineqarsinnaalissagaanni minnerpaamik inuiaqatigiilerinermut, niuernermut, tusagassiuutilerinermut, humanioramut, oqaluttuarisaanermut inatsisilerinermilluunniit bacheloritut ilinniarsimassaatit saniatigullu ukiuni marlunni suliffeqarnermik misilittagaqarsimassallutit.

Taakkulu saniatigut kalaallisut, danskisut tuluttullu piginnaasaqassaatit, qinnuteqartullu tamanik misilitsissinnaassasut saqqummersitami allassimavoq. Qinnuteqartullu minutsimut oqaatsinik 30-nik allassinnaasariaqartut, suliffiup nittarsaanneqarnerani allassimavoq.

AAMMA ATUARUK Pissaanilissuit nunatsinni pissaaneqarniuunnerat aarlerinarnerpaalersoq

Aammali peqqissuseq uppernassuserlu ajunnginnerpaamiissapput: Suliffimmut piukkunneqartut 'peqqissutsikkut aamma sillimaniarnermut tatiginarnermillu akuerissuteqarfigineqaqqaassasut, atorfiup nittarsaanneqarnerani allassimavoq.

'Kalaallit Nunaannut immikkut ilisimasallip aallaqqaasiutigalugu ukiumi siullermi akissarsiassai 521.045 koruuniupput, ukiorlu ataaseq atorfeqareernermi akissarsiat 608.589 koruunimut qaffanneqassallutik.