Tysklandimi politiit islamisiortut najugaqarfiinut pakasaasut
Tysklandimi politiit Tysklandimi islamisiortutut ingasaassiniartutut pasineqartut najugaqarfiinut marlunngornermi ullaaralaakkut pakasaallutik misissuipput.
Tysklandimi naalagaaffiup illoqarfiit pingaarnersaanni Berlinimi unnerluussisussaatitaasua taama ilisimatitsivoq.
Tysklandimi nunap immikkoortuini sisamani pakasaalluni misissuisoqarpoq.
- Peqqarniisaarniartoqarnissamik pilersaarusiortoqaleruttornerata pasilliutigineqarnera pissutaalluni Berlinimi, Brandenburgimi, Nordrhein-Westfalenimi Thüringenimilu pakasaalluni misissuisoqarpoq, naalagaaffiup unnerluussisussaatitaasua Twitterikkut taama allappoq.
Pasillerneqartut tjeteniamiuupput 23-t 28-llu akornanni ukiullit. Pasillerneqartut qassiunersut allassimanngilaq.
Islamisiortutut ingasaassiniartutut sumiiffinnik peqqarniisaarniarfigisassarsiorfigisinnaasaminnik ujartuisimasutut pasillerneqartut, Berlinimi politiit ilisimatitsissutigaat.
Politiit katillugit 180-it pakasaallutik misissuipput, ilaatigullu aningaasat, harddiskit saviillu arsaarinnissutigaat.
AAMMA ATUARUK Berlinimi lastbiilit inunnik piaaralutik aporsimmata qulingiluat toqutaapput
Politiit pisarnertik malillugu misissuinerminni pasillerneqartut ilaata oqarasuaataani angallattakkami assinik pasillernartunik nassaarnertik pissutigalugu peqqarniisaarniartoqarnissaanik pasilliuteqarput.
Berlinimi Tysklandimiittumi juullerpaluttunik niuffaffik 2016-imi decembarip qaammataani peqqarniisaarniarfigineqarpoq.
Tassani peqqarniisaarniartoq nunamut qimaasutut isernissamik qinnuteqartuusoq tunisiamiuuvoq. Lastbiilini aquttoq polenimiu inuartareriarlugu lastbiili tillippaa. Tamatumalu kingorna lastbiilinik juullerpaluttunik niuffaffikkoornermini inuit aqqanillit piaaraluni apornerisigut toquppai inuppaaluillu allat aqqunarlugit.
Taamaalioreerami qimaasimavoq, ullulli sisamat qaangiummata Italiami politiinit aallaaneqarluni toqutaavoq.
Taama pisoqareersorlu ilimagisat naapertorlugit islamisiortut ingasaassiniartut peqqarniisaarsaarniarnissaralui qulingiluat Tysklandimi oqartussaasunit pinngitsoortinneqarput.
Pinngitsoortitsinermi kingullermi angutit pingasut Islamisk Stat sinnerlugu qaartartumeeralutik peqqarniisaarniarnissaminnut pilersaarusiorsimasutut pasillerneqarnertik pissutigalugu Offenbachimi Tysklandip kippasissortaaniittumi tigusarineqarput.
