Qaqqaq innermik anitsisartoq ikkulummat Manilap eqqaamiui qimagussortinneqartut
Filippinerini qaqqaq innermik anitsisartoq Taal arsakunik qullaatitsivoq. Arsakut Filippinerit illoqarfiisa pingaarnersaannut Manilamut anngupput, Taalillu innermik anitsilernissaa tamatumalu kingunerisaanik tassaarsuaqarsinnaanissaa aarlerisaarutigineqarpoq.
Inuit tuusintilikkaat Taalip eqqaani najugallit angerlarsimaffitsik qimattariaqarsimavaat. Qaqqap innermik anitsisartup kraateria tatsip qeqqaniippoq, Manilamiillu kujammut 70 kilometerit missaannik ungasitsigisumiilluni.
Foto: Scanpix
- Taalip innermik taama tassanngaannartigisumik anitsiniarnera uissuummissutigaarput, Filippinerini Institut for Vulkanologimi pisortaq, Maria Antonia Bornas, oqarpoq.
- Lavap qaffakkiartornera maluginiarparput, nunalli qaavanut suli anngutinngilaq. Qaqqarlli taamaattup innermik anitsisinnaalernissaa naatsorsuutigisinnaavarput, Maria Antonia Bornas oqarpoq.
AAMMA ATUARUK Filippinerini qaqqap innermik anitsinissaa aarlerisaarutigineqarmat inuppassuit qimagussortinneqartut
Taalimi taserujussuaqarpoq, tassanilu tassaarsuaqarsinnaanissaa, Filippinerini oqartussat mianersoqqussutigaat.
Inuit qeqertami Luzonimiittut 24.000-nit amerlanerusut najugaqarfimminnit qimagussorneqarput. Taal Luzonimi inissisimavoq.
Takornarialli Filippinerini oqartussat mianersoqqussutaat tusaanngitsuusaarlugit Taalimut illoqarfinni qanittuniittuniiginnarput, qaqqap innermik anitsinissaa takorusullugu.
- Inuunerup ingerlanerani ataasiaannarluni immaqa misigisasssaavoq, takornariaq Israelimeersoq, Benny Borenstein, oqarpoq.
Qaqqamit innermik anitsisartumit kujammut kimmukanneq illoqarfiit marluk Agoncillo Lemeryilu inissisimapput, taakkualu qaqqamit arsakunik issusuunik maanna qallerneqarsimalerlutik. Tamaani aqqusernit tamanna pillugu angallavigisassaajunnaarsimapput.