Iran timmisartumik nakkartitsinermut akisussaasuunerartoq
Ukrainemiut timmisartuisa ilaata, Iranimi illersornissaqarfimmit sapaatip-akunnerata siuliani kukkuluttornikkut nakkartinneqarnera misissoqqissaarneqassaaq.
Iranip præsidentia, Hassan Rouhani, marlunngornermi taama oqarpoq.
Timmisartumik kukkuluttorlutik nakkartitsinerat isumakkeerfigineqarsinnaanngitsoq nakkartitsinermullu akisussaasuusut pillarneqarumaartut, taassuma ilanngullugu oqaatigaa. Inuullu ataasiinnaap kukkuluttorsimasinnaanera ilimaginngilaa:
- Iranimi naalakkersuisut iranimiut nunanillu allaneersut timmisartumi nakkartumi issimasut ajunaarnerannut akisussaasuupput, Rouhani oqarpoq.
AAMMA ATUARUK Iranimiut timmisartoq nakkartinneqartoq pillugu akerliussutsimik takutitseqqittut
Ukrainemi timmisartuutileqatigiiffiup, Ukraine International Airlinesip, timmisartua Iranimi illoqarfiit pingaarnersaanniit, Teheranimiit, tingereernermi kingunitsiannguagut rakettimik saassussunneqarluni nakkartinneqarmat inuit 176-it ajunaarput.
Timmisartup nakkartinneqarneranut akisussaasutut pasineqartut arlallit tigusarineqartut, Iranimi eqqartuussiveqarfiup oqaaseqartitaata, Gholamhossein Esmailip, marlunngornermi oqaatigaa.
Præsident Rouhani nakkartitsineq sukumiisumik misissorneqarniassammat eqqartuussivimmik immikkut ittumik pilersitsiniarpoq.
- Eqqartuussiveqarfik eqqartuussivimmik immikkut ittumik pilersitsisariaqarpoq, eqqartuussisullu nuimasut immikkullu ilisimasallit tassani eqqartuussisuussapput. Nunanit tamalaanit alaatsinaanneqartussaassaagut, Iranip præsidentia oqarpoq.