Kielsenip inuusuttut ukiortaami oqalugiarnermini kaammattorpai: Sapinngilasi!

Nunarput tuniniagaanngilaq! 

Naalakkersuisut siulittaasuata, Kim Kielsenip (S), ukiortaami oqalugiaatimini tamanna aamma erseqqissaatigaa. Taama oqarnera amerikamiut præsidentiata nunatsinnik pisiarinnikkumaneranik amerikamiut nutaarsiassaqartitsiviisa ukiassariartulernerani allaaserisaqaqattaaleruttornerannit akisuanertutullusooq ippoq.

Ukiortaami oqalugiaataa inuussutissarsiornermut, ilinniartitaanermut meeqqanillu atornerluinermut tunngasunik aamma imaqarpoq. Inuusuttullu toqqaannartorujussuarmik aamma kaammattorpai:

- Inuusuttut oqarfigerusuppassi – utoqqartagut toqqissillutik utoqqalissappata taava sapiissuseqarnersi takutissiuk, qajavissuit kinguaavisut, taqigasi, tunniutiinnarasi, makigitsi. Sapinngilasi. Ilinniaritsi, nunatta pisariaqartippaasi. Nunarput ingerlaqqittariaqarpoq, nunarsuarmioqatigiit akornanni unammillersinnaasariaqarpoq, Kim Kielsen ukiortaami oqalugiarnermini oqarpoq.

Nunatta nunarsuarmi inissisimanera

Nunarput nunarsuarmi qeqertani annersaasoq nunanit tamalaanit eqqumaffigineqarnerulerneranik kinguneqartumik 2019-imi allaaserineqaqattaareersorlu oqallisaasorujussuuvoq.

- Ukioq 2019 eqqaamaneqarumaarpoq amerikamiut præsidentiata Trumpip nunatsinnik pisiarinnikkumagaluarneranut. Nunatsinniit akissuterput ataasiinnaavoq ersarissoq: Nunarput tuniniagaanngilaq!, Kim Kielsen oqarpoq.

- Naqissusissavara, nunarsuarmioqataanitsinni inissisimanerput, siunissarpullu nunatta inuinit kisimi aalajangerneqartassammat!, Kim Kielsen ukiortaami oqalugiarnermini oqarpoq.

Nunarput amerikamiorpaalunnit 2019-imi tikeraarneqarpoq. Amerikamiut sinerissami alapernaarsuisuisa qullersaata, Karl Schultzip, Nuummut ukiaq tikeraarnera KNR-ip ilaatigut aamma allaaseraa.

Nunatta soqutigineqarneruleraluttuinnarnera tamatsinnut iluaqutaassaaq

Atorfilittat ilaat nuimasoq, Thomas Ulrich Brechbuhl, nunatsinnut aamma tikeraarpoq. Thomas Ulrich Brechbuhlilu Trumpip amerikamiullu nunanut allanut ministeriata, Mike Pompeop, nunanut allanut politikkiannik naapertuinissamik qulakkeerisartutut isigineqarpoq. USA-lu arfineq marlunnik sulisulimmik Nuummi ukioq manna sinniisoqarfeqalertussaavoq.

- Qilanaarutigaarali amerikamiut naalakkersuisuinik suliffeqarfissuinillu suleqateqarnitta annertuninngornissaa. Naatsorsuutigaaralu uani ukiumi nutaami amerikamiut nunatsinni anigaasaliinissamut soqutiginninnerat ersarinnerusumik angusaqarfiujumaartoq. Uagutsinnut unammillernartuuvoq nunatta avataaniit soqutigineqarnera annertusiartuinnarmat, Kim Kielsen oqarpoq.

- Avataaniit taamannak annertuumik aningaasalersuinissamik soqutiginninnerup nunatsinni innuttaasunut, avatangiisitsinnut, silap pissusiata allanngoriartorneranut nunattalu aaqqissugaanikkut ineriartorneranut iluaqutissanngortinneqartassaaq. Naalakkersuisuniit siunertarput ersarippoq: Nunatsinni qanoq iliuutsit tamarmik nunatsinnut inuinullu iluaqutissanngortinneqartassapput.

Suliffissanik aningaasarsiorfissanillu nutaanik pilersitsinerit nunatsinnut aamma iluaqutissanngortinneqassasut, naalakkersuisut siulittaasuata neriorsuutigaa. Kim Kielsenillumi kissaat taannarpiaq ukiortaami oqalugiaammini aallarniutigaa.

Inuuniarnikkut ajornartorsiutit angajoqqaallu meerartaarnermi sulinngiffeqartarnerat

- Ukiorpanni sapiissuseqarluta alloriarnerit annertuut tigusarsimavagut. Sulili namminiilivinnissamik sinnattup aanaakkunnik aataakkunnik, ningiukkunnik ittukkunnik, kingornussimasatta piviusunngortinnissaanut aningaasarsiorfissanik suliffissanillu nutaanik pilersitsinissamut sapiissuseqarnerusariaqarpugut, Kim Kielsen oqarpoq.

Tamatuma kingorna 2019-imi oqallisaaqisut ilaat oqaaseqarfigaa uunga tunngasoq: Soorlu Tasiilami inuuniarnikkut ajornartorsiutit annertuut.

Tamanna Siumukkut Inatsisartuni ilaasortaatitaannut ikinnerussuteqartitsingajannermik kinguneqarpoq. Demokraatit illuatungiliuttullu Danmarkimiit ikiorneqarnissamut aalajangiiffigisassatut siunnersuuteqarput, siunnersuulli nutaarsiassaqartitsivitsivinnit ulluni tallimani allaaserineqaqaattaareersorlu Siumukkormiut aatsaat akueraat.

Tamatuma kingorna 5,3 millionit koruunit Danmarkimiit ikiuigasuariartortussanut aningaasaliissutigineqarput, tamatumalu saniatigut nunatsinni meeqqanik kinguaassiutitigut atornerlunneqarsimasunik ikiuinermut 80 millionit koruuninik aningaasaliisoqarnissaa Folketingimit novembarimi akuerineqarpoq.

Naalakkersuisullu tamatumunnga atatillugu 7,5 millionit koruuninik 2020-mut aningaasanut inatsimmut immikkoortitsipput.

- Tamanna qujassutigaarput. Naalakkersuisuniit pingaaruteqarluinnartutut isigaarput kommunit kissaataat aallaavigalugit tapiissutit meeqqat inuusuttullu atugaasa pitsanngorsarnissaannut atorneqarnissaat, Kim Kielsen oqarpoq, tamatumalu kingorna angajoqqaat erninermut meeravissiartaarnermulluunniit atatillugu sulinngiffeqartarnerat - 2020 aallarnerfigalugu sapaatit akunnerinik sisamanik sivitsorneqartoq - pillugu oqaaseqarpoq.

- Meeqqanik sumiginnaanerit atornerluinerillu naammaleqaat. Annersaanerit naammaleqaat. Aamma ikiaroornartumik imigassamillu atornerluinerit naammaleqaat.