Niels Thomsen politikkimit tunuarpoq
Demokraatit siulittaasuat Inatsisartunullu 2018-imi qinersinermi qinigaalluaqisoq, Niels Thomsen, ingerlaannartumik atuutilertussamik politikkikkut suliaminit tamanit tunuarpoq.
Niels Thomsen stressi pissutigalugu sivisujaami sulinngiffeqarpoq, politikkimiilli maanna tassa tunuavilluni.
Politikerit silarsuaanni oqaatsitigut sakkortuuliortoqarneruleraluttuinnarnera tunuarnerminut pingaarnertut aalajangiisuunerarpaa:
- Qineqqusaarnerup nalaani kingornalu, qanga ukiut 20-it missai matuma siornatigut iliuuserisimasannut tunngassusillit pillugit uannut saassussisarnerit nukersuutigisarsimavakka, Niels Thomsen tusagassiutinut allappoq.
AAMMA ATUARUK Demokraatini nikittaqattaartut: Nivi Olsen ukiut tallimat ingerlanerini siulittaasut tallimassaalersoq
Niels Thomsen Inatsisartunut 2018-imi qinersinermi 2.773-inik qinersisoqarpoq - Inuit Ataqatigiit taamanikkut siulittaasuannit, Sara Olsvigimit, taamaallaat qaangigaalluni.
Demokraatit siulittaasorigallagaata aalajangiussaa ajuusaarutigaa:
- Aalajangiussaq aliasuutigeqaara. Demokraatinut, Kalaallillu Nunaannut ajoqaaq, politikkikkummi pikkorilluinnartoq nunatta annaavaa, Demokraatit siulittaasorigallagaat, Nivi Olsen tusagassiutinut nalunaarummi allappoq.
Niels Thomsenip politikkikkut suliaminit tunuarnera Anna Wangenheimip Inatsisartuni aalajangersimasumik ilaasortanngorneranik kinguneqarpoq.
Partiilu nutaamik siulittaasoqalissaaq. Partiip siulittaasui tamatuma qaqugu pinissaata aalajangernissaanut sapinngisamik piaarnerpaamik ataatsimiissassut, Demokraatit nalunaarutigaat.
