Kuummiuni Sermiligaamilu imermi uuliamik takussutissaqartoq

Kuummiuni Sermiligaamilu erngup misissorneqarnerani uuliamik takussutissaqartoq, Namminersorlutik Oqartussat ilisimatitsipput.
Namminersorlutik Oqartussat nunaqarfinni Kuummiuni Sermiligaamilu erngup uuliamik akoqarnera imermik misissuinermi paasineqartoq tusagassiuutinut nalunaarutigaat.
oktobarip 29-at 2019 11:08

Namminersorlutik Oqartussat nunaqarfinni Kuummiuni Sermiligaamilu erngup uuliamik akoqarnera imermik misissuinermi paasineqartoq tusagassiuutinut nalunaarutigaat.

- Matumani uulia annikitsuararsuaq, peqqissutsimut ulorianartorsiortitsinngitsutut naliliiffigineqartoq pineqarpoq. Nunatsinni Nakorsaaneq naliliivoq, imeq suli imigassatut atorneqarsinnaassasoq, Namminersorlutik Oqartussat allapput.

Qanoq ililluni mingutsitsisoqarsimanersoq suli ilisimaneqanngilaq, tamannali misissorneqassaaq.

Namminersorlutik Oqartussat imeqarfinni erngup mingutsinneqarsimanerata peerneqarnissaa pissutigalugu kulfilterinik immikkut ittumik pilersuisoqassasoq aamma ilisimatitsissutigaat.

Nukissiorfiit Uummannami erngup imerneqarsinnaasup mingutsinneqarsimanera piffissami sivitsortumi suliaraat. Tassani mingutsitsinerup annertuallaarnera pissutigalugu imeq imerneqaqqusaanngilaq.