Kajumissutsimik suleqataasut nunamik qamisaareerneranni: Illersuutikinneq maalaarutigaat

Qamisaaqataasummi ilaat putsumik najuussuivallaarluni napparsimmavimmi nakkutigineqartariaqarsimavoq.

- Quersungaatsiaqattaalerama, qaffersaannalerlunga, timiga kakillaalulluni isigisakka qillaalallutik. Immaqa pujorsuup iluaniinnerup kinguneri, Karl Peter Berthelsen oqarpoq.

Innermik qamisaajartortunik umiatsiaaqqamik angallassisup Aputsiaq Jonathansenip pujoqarnerujussuanut tupaallassimavoq:

AAMMA ATUARUK Qamikkuminaatsoq: Sisimiut eqqaanni qaqqami ikuallanneq suli ikualavoq

- Tikikkiartornerinnaaniluunniit pujorsuarmut pigatta suli campiusoqarfiusumut pinata, allaat isikkiveqarani taakunga. Pujorsuarmi angalalluta kiisami tikippugut taavalu unnuaq tamaat pujormiuulluta.

Nuna ikuallattoq qaammat sinnerlugu qamisarneqarpoq.

Sineriammit aggerfinnit arlalinnit Danmarkimiillu qatserisartut Sisimiuliaapput qamisaanermut ikiuukkiartorlutik.

Atortut naammanngitsut

Ikuallattumilu sivisuumik pujormiuunissamut tulluanngitsunik atortoqarlutik ikiuussimallutik Aputsiaq Jonathansenip oqaatigaa.

- Anersaartuutigisavut attartuujunngitsut, pujumik suli najuussuinangaatsiartut. Isarussanik arlaannilluunniit isigut illersorneqanngillat putsumut.

Sillimaniarnermut akisussaaffik Qeqqata Kommunianiippoq. Taamalu annertutigisumut ikuallattoqarnissaanut piareersimasimanatik nassuerutigaat:

- Nunap ikuallattup annertussusaa taamarsuusimanngissorisimagaluarparput. Unammillernarsimaqaarlu, Qeqqata Kommuniani ajornartoornermi aqutsisuni pisortaq Lars Løgstrup oqarpoq, nangipporlu:

- Qatserisartutsinnut, kajumissutsimillu sapaatip akunneranni kingullermi suleqataasunut atortugut naammassimanngillat.

Nunap ikuallarujussuarnera sillimaniarnikkut ilinniarfiusoq Lars Løgstrupip ilanngullugu oqaatigaa. Taamalu pisoqaqqeratarsinnaaneranut atortussanik amerlanerusunik piniarsimallutik oqaatigaa.