Foto: KNR / Inge S. Rasmussen

Innuttaasut: Imigassartortarneq inuup nammineq akisussaaffigaa

Imigassaq pillugu inatsit siorna sukateriffigineqartoq maanna qasukkaaffigineqaqqippoq. Tamatumuuna amerlanerusutigut. Nuummi innuttaasut aqqusinermi naapitavut tamatumunnga KNR-imit isummertippavut.

Imigassaq pillugu inatsit allanngortinneqarpoq. Imigassartortarneq inuup nammineq akisussaaffigigaa, innuttaasunit isumaqarfigineqarpoq: 

- Nalinginnaasutut allatulli nioqqutaalernissaa kissaatigaara, saajulersuineq kusassarnerugami isumaqaranilu, Emilie Rosbach Christiansen oqarpoq.

LÆS OGSÅ Ændringsforslag til alkoholloven førstebehandles i Inatsisartut

LÆS OGSÅ Flertal vil ændre alkoholloven

Inatsit, siorna marsimi, atuutilertoq, naapertorlugu imigassat nioqqutigineqartut assiaqusersorneqassapput pilerisaarutiginissaalu inerteqqutaavoq.

Emilie Rosbach Christensen Assi: Emilie Rosbach Christensen

Amerlanerussuteqartut akueraat

Taamali inerteqquteqarnerup atorunnaarsinneqarnissaanut allannguutissatut siunnersuut Inatsisartut pingasunngornermi pingajussaaneerpaat, taamaalillunilu atuukkunnaartussanngorluni.

Sukaterisimagaluarneq inuiaqatigiit imigassartortarnerannik allannguinavianngitsoq, politikerit amerlanerussuteqartut ilaatigut tunngavilersuutigereerpaat. 

Akisussaaffimmi inummiittoq, innuttaasut naapitatta ilaat aamma isumaqarpoq.

- Isumaqarama innuttaasut atuinertik namminneq akisussaaffigissagaat. Isumaqarpunga taamaaliortoqalermat aqunniarneqarunnaarnertut misinnartoq, Aviaq Kleist Sethsen oqarpoq.

Kingunissai takoqqaarusukkaluaraat

Innuttaasulli ilaata imigassat aalakoornartortallit nioqqutissat akornanniinnerat maqaasinngilaa, taamaammallu maannamut assiaqutseqqasimanerat pitsaagisimallugu.

Aviaq Kleist Sethsen Assi: Aviaq Kleist Sethsen

- Assiaqutserneqarnerat iluareqaara, piumagaannimi inimut immikkoortumut iseriarluni imigassat qimerlualaarneqarsinnaapput, Maliina Lyberth oqarpoq.

Imigassamik aalakoornartortalimmik nioqquteqarnerup killilersorneqarnera ussassaarisarnerullu inerteqqutigineqarnerata pitsaasumik kinguneqarsinnaanerat takoqqaarniarneqannginnera naapitatta ilaata ajuusaarutigaa:

- Imaassinnaavormi suliniutip taassuma ajornartorsiummik angeqisumik aaqqiisinnaasimagaluartoq, Michael Hansen oqarpoq.

Imigassaq pillugu inatsisip allannguutai suli atuutilinngillat. Allannguutit tamanut nalunaarutigineqarpata aatsaat inatsit atuutilissaaq.

 

LÆS OGSÅ - Inatsimmik sakkukillinissamut aalajangiinnginnermi eqqarsarluaqqaaritsi

LÆS OGSÅ Forhastet at ændre alkohollov

Namminersorlutik Oqartussat, tamatuminnga tamanut suli nalunaaruteqanngitsut, oqaaseqartinniaraluarpagut iluatsinnaguli.

Imigassanik aalakoornartortalinnik niuertarfinni ulluinnarni pisisinnaaneq akunnernik marlunnik sivitsorneqassaaq. 

Taava aamma inuusuttut 18-it inorlugit ukiullit caféni imigassanik sassaallerfiusartuni, unnukkut nalunaaqutaq arfineq-pingasup kingorna isersimaaqqusaannginnerat atorunnaarsinneqarluni, nalunaaquttap unnukkut aqqarnup tungaannut isersimaaqqusaalissapput.

Alkohollov

 

Kommentarer



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Live flyinformation ank./afg.

TTV s 350 Aktuel TV oversigt

TTV s 610 Aktuel Radio oversigt