Socialdemokratit: Kalaallit meeqqat misileraatitut Danmarkiliartinneqartut utoqqatserfigineqartariaqarput

Kalaallit meeqqat 22-t misileraatitut 1951-imi Danmarkiliartinneqartut utoqqatserfigineqartariaqartut, Danmarkimi Socialdemokratit Folketingimut qinersereernerup kingorna naalakkersuisungortitsissagunik sulissutiginiarpaat.

Kalaallit meeqqat 22-t misileraatigineqarlutik ilaquttaminnit ukiut 68-it matuma siornatigut peersinneqarlutik Danmarkimut aallartinneqartut Naalagaaffimmit pisortatigoortumik utoqqatserfigineqassappat?

Inuit Ataqatigiit sinnerlugit Folketingimut ilaasortap Aaja Chemnitz Larsenip siunnersuutaa aallaavigalugu Folketingimi tamanna ullumi oqallisigineqarpoq.

Oqaluttarfimmiillu oqaaserineqartut ilaat uissuumminartortaqarput.

Utoqqatsertoqarnissaa Danmarkimi naalakkersuisut assigiinngitsut itigartitsissutigisarsimagaat, Socialdemokratit maanna allatut oqarput.

Socialdemokratimmi Folketingimut qinersisoqareernerup kingorna naalakkersuisuutitaqalissappata pisortatigoortumik utoqqatsertoqarnissaa, Socialdemokratit Kalaallit Nunaannut tunngasunut oqaaseqartartuata Karin Gaardstedip oqaluttarfimmiit neriorsuutigaa.

 

Utoqqatsertoqarnissaanut piffissanngorsoraat

 

- Kalaallit meeqqat 22-t sumiginnagaasimanerannut utoqqatsertoqarnissaanut maanna piffissanngorpoq. Aamma ukiorpassuit matuma siornatigut pisimagaluarpalluunniit. Meeqqat Danmarkimut pinngitsaalisaassummik nuutsinneqarnertik kingunerluutigivaat, Socialdemokratit Kalaallit Nunaannut tunngasunut oqaaseqartittagaa Karin Gaardsted oqarpoq.

Meeqqat pineqartut 1950-ikkunni Danmarkimi ilaqutariinnut aallartitaapput danskillu atuarfiini oqaatsinik kulturimillu ilinniartinneqarlutik. Nunatsinnut uterunik inuiaqatigiinni Danmarkimut samminerutinniartuni maligassiuisuunissaat taamani neriuutigineqarluni.

Meeqqalli ilarpassuisa nunatsinni ilaquttatik uterfiginngitsoorpaat. Allallu angerlaramik ilaatigut oqaatsiminnik annaasaqarnertik pissutigalugu ajornartorsiulerput meeqqallu angerlarsimaffiinut inissinneqarlutik.

Meeqqat kalaallit 22-t taamanikkut Danmarkiliartinneqartut akornanni arfinillit kiserngorupput.


Ministeri utoqqatserusunngilaq

 

Meeqqat kiserngoruttut utoqqatserfigineqarnissaannut Socialdemokratit ammaassisut, meeqqanut isumaginninnermullu ministeri Mai Mercado illuatungiliivoq:

- Utoqqatsertoqarnissaanut apeqqut naalakkersuisunit tunngaviusumik aalajangiiviusussaavoq. Suliamut uunga aamma taamaappoq. Qanga aalajangiivigineqarsimasut tunngavigisimasaat ullumi ilisimatsinnut allaanerulluinnarput, tamannalu aallaavigalugu utoqqatsertoqarsinnaanngitsutut naalakkersuisuniit isigaarput, Danmarkip meeqqanut isumaginninnermullu ministeria Mai Mercado oqarpoq.

1951-imi qanorpiaq pisoqarsimaneranik misissuisoqaleruttornera, ministerip akerlianik innersuussutigaa.

Misissuinerup qaammatit 14-it tulliuttut ingerlaneranni naammassineqarsimanissaa, naalakkersuisut siulittaasuata Kim Kielsenip, statsministerillu Lars Løkke Rasmussenip isumaqatigiissutigaat.



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Flyinformation ankomst/afgang

TTV s 350 TV oversigt

TTV s 610 Radio oversigt