Aasianni ernisarfiup matuneqarnissaanik nammineq isumaqatigiissutigisani IA-p akerlilersoraa
Aqqa Samuelsenip partiimi isumaqatigiissutigisimasaanik ilumut nakkutiginnilluarnersoq Partii Naleqqameersup Jens Napaattuup apeqquserpaa. Aasianni ernisarfiup matuneqarnissaanik aalajangertoqarneranik Samuelsenip sapaatit akunneranni uani isornartorsiuinerata kingorna tamanna pivoq. Samuelsenimmi partiia aningaasanut inatsimmut akuerseqataalluni taaseqataavoq, matusisoqarnissaalu tassani erseqqissumik atuarneqarsinnaalluni.
- Inuit Ataqatigiit Naalakkersuisut 2019-imut aningaasanut inatsit pillugu siorna isumaqatigiinniarfigaat, Naalakkersuisullu piffissaq kingulleq atorlugu isumaqatigiissuteqarfigalugit. Isumaqatigiissutigisartillu maanna naammagittaalliutigilerpaat, Jens Napaattooq oqarpoq.
Ernisarfiit pillugit paasissutissat
- Aasiaanni ernisarfik ukioq manna juulip aallaqqaataani matugallarneqassaaq. Sulisussarsisoqarsinnaannginnera tamatumunnga pissutaavoq.
-
Qasigiannguani, Qeqertarsuarmi, Paamiuni, Narsami, Nanortalimmi Upernavimmilu ernisarfiit 2011-mi matuneqarput.
Maniitsumi ernisarfik 2012-imi matuneqarpoq.
Uummannami ernisarfik 2017-imi matuneqarpoq. - Naartusut erninerminni ajornartorsiuteqalersinnaasutut nalilerneqartut tamarmik Nuummut erniartornissamut innersuunneqartarnissaat 2000-ikkut aallartinneranni aalajangiunneqarpoq.
- Tamatumunngalu peqatigitillugu ernisarfinni ernisussiortup imaluunniit ernisussiortumut ikiortip saniatigut allanik sulisoqarnissaa piumasaqaatigineqalerpoq. Pilaanikkut ernisitsineq, aanaartoortoqarneranik ikiuineq naalungiarsummillu uummarsaaneq tamatumani pineqarput.
Kingullertigullu oqaatigineqartut tunngavigalugit aningaasanut inatsit qanoq ittoq siorna akueralugu taasissutigisimanerlugu Inuit Ataqatigiit ilisimalluarneraat Napaattuup maanna apeqquserpaa.
- Tuaviupilussimassapput isumaqatigiissutigisartillu atuaqqissaarnagu, Jens Napaattooq oqarpoq.
AAMMA ATUARUK Ernisarfiup matunissaa assigiinngitsunit isornartorsiorneqartoq
Pineqartulli, Aqqa Samuelsenip, isornartorsiorneqarnini tunngavissaqannginnerarpaa. Partiimimi Aasianni ernisarfiup matuneqarnissaanut akerliusimasoq oqaatigaa.
Partiilli matusinissamut akerliusimaneranut uppernarsaatissanik nassaarsinnaasimanngilaq, ilisimaneqartutullu IA-p aningaasanut inatsimmut akuerseqataalluni taasineranut aamma allanngortitsinngilaq.
IA-p aningaasanut inatsisip imarisaanik qanoq ilisimasaqartiginera aatsaat apeqquserneqalinngilaq. Kalaallit Danmarkimi ilinniagaqartut kattuffiannut Avalammut tapiissutit affaannanngortinneqarnissaannik Naalakkersuisut aalajangernerat marsip aallartinnera isornartorsiorneqarpoq.
Taamatullu pisoqarnerani IA-p ilinniartitaaneq pillugu oqaaseqatartuata, Sofia Geislerip, aningaasanut inatsimmi immikkoortup pineqartup partiimit eqqumaffigineqarsimannginnera nassuerutigaa.
