Julie Ninalu Melodi Grand Priximi peqataalersut
Nunatsinni arnani erinarsortartuni erinaginnerpaanit marluk naalagaaffeqatigiinni erinarsortartunut unammillerput.
Julie Berthelsenip Nina Kreutzmann Jørgensenillu erinarsuut normu 7 Dansk Melodi Grand Prix 2019-imi tusarnaartitsisarfimmit februaarip 23-anni atussavaat, DR-ip tusagassiinermut immikkoortortaqarfia allappoq.
Erinarsuut ‘League of Light’-imik ateqarpoq taannalu Marcus Winther-John aamma Joachim Ershaard peqatigalugit arnanit erinagissunit marlunnit taalliarineqarpoq.
Julie Ninalu tuluttut erinarsorput kalaallisulli verseqarnissaanut aamma inissaqarpoq. Erinarsuut musikvideotaalu nunatsinnit immiussanik kusanartunik ilaqartoq DR-ip nittartagaatigut tusarnaarlugulu isiginnaarsinnaavat.
Arnat erinarsortartut marluk oqarnerat naapertorlugu erinarsuut naalagaaffeqatigiinnermut imaluunniit ataatsimoornerup amigaataaneranut tunngavoq.
Dr.dk-mullu ima oqarput:
- Misigissutsitta aqunnissaanut sungiusarnissarput pingaaruteqarpoq, Grand Priximilu tusarnaartitsisarfimmi nikorfanissarput uagutsinnut immikkut isumaqarpoq. Misigissutsit namminerlu oqariartuutit sakkortuut uagutsinnit annerungaatsiartut nassataralugit tusarnaartitsissaagut, Julie Ninalu dr.dk-mut oqarput.
