Aalajaallutik sulisut nersornaaserneqartut
Nunatsinni pisortani sulisuusut marluk nersornaaserneqarmata persuarsiutigineqartumik nalliussineqarput.
Nukissiorfinni ukiorpassuarni sulisoq, Therkild Lynge Dronningip nersornaasiuttagaanik sølviusumik sisamanngornermi nersornaaserneqarpoq. Therkild Lynge siorna ukiut 40-nngortortoq Namminersorlutik Oqartussanit aamma nersornaaserneqarpoq.
- Therkild Lynge ilisimasarpassuaqarlunilu ilikkagarpassuaqarpoq, tamakku Nukissiorfinnik atuisunut atorfilinnullu iluaqutaapput. Isumagissaartuaannartuuvoq sulisuullunilu suliffeqarfimmi tamarmi nuannarineqarluartuuvoq. Suliassat piffissaagallartillugu naammassineqartarnissaat pingaartitaraa, tamakkulu pitsaassuseqarluartumik naammassineqarnissaat sulissutigisarpat, teknikimut pisortaq Mogens Nielsen nersornaasiinermi oqarpoq.
Upernavimmi nersornaasiisoqartoq
Rudolf (Ruula) Kleemann KNI Pilersuisumi umiarsualivimmi 1978-imit maannamut sulisuusoq, Dronningip nersornaasiuttagaanik sølviusumik nersornaaserneqarpoq.
-Rudolf Kleemann, Ruula, nalunngilara saqqarmiulerneqarnissannut innersuunneqalerninniilli angajoqqaatit uaniitikkitit, aamma qularinngilara qamaniisikkitit. Qujanartumillu qatanngutitit ilaallu najuussinnaasut ilagaagut pingaartorsioqatigalutalu, KNI A/S-imi sulisoqarnermut pisortaq, Mikol Poulsen nersornaasiinermut atatillugu oqarpoq nangillunilu:
Nipituuliortuunngilatit, aamma nammineq malugaara ilumoortoq. Nipaatsumik suleriuseqaraluarlutit suliat eqqortumik suliarineqarnissaat pingaartitarivatit, ippigisaqartillutillu oqaatigisarpatit, Mikol Poulsen oqarpoq.