Aalisarnermut inatsit mittarfiillu kinguartinneqartussanngortut

Inatsisartut immikkut ittumik marsip ulluisa 13-ianni ataatsimiilerunik Inatsisartunut qinersinissaq kisiat oqallisigissavaat.

Inatsisartullu sunarpiaq isummerfigissaneraat, Inatsisartut siulittaasuata, Lars-Emil Johansenip ulloqeqqanut radioaviisimi nassuiaatigaa:

- Tamatigut qinersisoqassatillugu qinersineq pillugu inatsimmik Inatsisartut aalajangersaaqqaartarput. Tassa inatsisissatut allatulli suliarineqassaaq, taamaallaat assigiinngissutigalugu siunnersuuterput akuerineqassappat, ullup ataatsip ingerlanerani inatsisissatut siunnersuut siullermeerlugu, aappassaaneerlugu pingajussaaneerlugulu suliarineqassalluni. Tassa taanna suliarineqassaaq. Inatsimmik tunngaveqarluni qinersineq ingerlanneqarniassammat, Inatsisartut inatsisiliussapput, siunnersuut najoqqutaralugu iliornissaq isummerfigissallugu, Lars-Emil Johansen oqarpoq.

Naalakkersuisut siulitaasuata siunnersuutaata malinneqartarnera ileqquusoq

- Inatsisartummi taava qinersisoqannginnissaanik aalajangiisinnaappat?

- Aap. Inatsisartut aamma soorunami aalajangersinnaapput, maannamut qinersinissaq tunngavissaqanngitsoq. Kisianni soorunami taakkua partiit akornanni isumaqatigiinniutaareersimanissaat tamatigut naatsorsuutigineqartarpoq. Kisianni ajornaquteqanngilaq, Inatsisartut aalajangissappata, maannakkut qinersinissaq tunngavissaqanngitsoq. Kisianni ileqquuvoq, Naalakkersuisut siulittaasuata siunnersuutaata malinneqartarnera, Lars-Emil Johansen oqarpoq.

Siunnersuutit tamarmik atorunnaartut

- Taava qinersisoqartussanngormat Inatsisartut upernaakkut ataatsimiinnissaat kinguartinneqarpoq. Maanna qinersisoqartussanngornerani, soorlu aalisarneq pillugu inatsisissatut siunnersuut taava qanoq pineqassava?

- Tassa aalisarneq pillugu inatsisissatut siunnersuut, aammalu inatsisissatut siunnersuutit allat suliaralugit aallartinneqareersimagaluartut, suli naammassineqanngitsut, imaluunniit suli aallartinneqanngitsut taakkua tamarmik, maani oqartarnerput malillugu, kivipput. Tassa imaappoq, qinersinissaq aalajangiunneqassappat, upernaamullu ataatsimiinnissaq pilersaarusiorlugu massakkut naammassisarput atorunnaassappat, taava oqaluuserisassat, siunnersuutit tamarmik, aamma aalisarnermut inatsit ilanngullugu, taakkua tamarmik atorunnaassapput, aatsaallu oqaluuserineqartussanngorsinnaallutik Naalakkersuisut nutaat Inatsisartullu nutaat taakkua saqqummiuteqqissappatigit, Lars-Emil Johansen oqarpoq.

Naalakkersuisut utaqqiisaasumik naalakkersuisutut inissittut

Naalakkersuisut mittarfinnut suliniutinut aningaasalersorneqarnissaannut siunnersuutaat aamma oqaluuserineqartussaajunnaartut ilagivaat. Tamanna isumaqarpa, mittarfiliornissamut pilersaarutit qinersinerup kingorna unitsinneqarallassasut?

- Tassa sulineq tamarmi massakkut unikkallassaaq. Qinersisoqareerpat, Inatsisartut ataatsimiilerpata, taavalu Naalakkersuisut pilersinneqarpata, nutaamik isummertoqassaaq. Kisianni imaanngilaq taakkua suliassat tamarmik pinngitsooratik unitsinneqartut. Taakku qaqeqqinneqarsinnaapput, taakkulu aamma Naalakkersuisuni nutaani, Inatsisartuni nutaani isummerfigineqarsinnaallutik aallartinneqaqqillutillu. Kisianni tassa qinersinissaq marlunngorpat, marsip 13-iani aalajangiunneqarpat, taava Inatsisartut sulinerat tamarmi unissaaq, Naalakkersuisullu aamma utaqqiisaasumik Naalakkersuisutut taamaallaat inissisimalissallutik, Lars-Emil Johansen oqarpoq.

Kim Kielsenip apriilimi qinersinissamut inatsimmik Inatsisartunut akuersissuteqaqqulluni ataasinngormat nalunaaruteqarnera pissutigalugu Naalakkersuisut naalakkersuisuugallartutut inissittut Naalakkersuisut siulittaasuata naalakkersuisoqarfianit uppernarsarneqarpoq.

Naalakkersuisut atuunnissaat pillugu kaajallaasitaq UANI atuarneqarsinnaavoq.