58-inik ukiullip ujaarineqarnera silap ajornera pissutaalluni ajornakusoorpoq

Angut Ilulissanit umiatsiaaqqamik sapaatiummat aallarpoq, Qeqertarsuarmullu ullup ingerlanerani anngunnissaa naatsorsuutigineqaraluarpoq, Qeqertarsuarmulli anngunnani.

Ilaqutaasut angut 58-inik ukiulik oqarasuaatitigut ullumi ataasinngornermi sivikitsumik attaveqarfigisinnaasimavaat, attaveqaataali pitsaavallaarsimanani. 

Angutip sumiiffini nassuiaatigisinnaasimavaa, sumiiffillu tamanna politiit, Issittumi Sakkutooqarfik qulimiguulillu suleqatigalugit ullumi ujaasiffigivaat. Sakkutuut umiarsuaat alapernaarsuut aamma ujaasiffimmukartinneqaleruttorpoq.

Nuummi politiit pigaartuata Kunuk Frederiksenip tamanna ilisimatitsissutigaa.

- Sumiiffiup nalaani issippoq anorlerlunilu, angutillu sukkanerpaamik nassaarineqarnissaa tamanna pillugu sulissutigineqarluni, Kunuk Frederiksen oqarpoq.

Umiatsiat arlallit ujaasinermi peqataapput, tamaanili apingaatsiarnera pissutaalluni Ilulissanut utiinnartariaqarsimallutik. Qulimiguulik ujaasinermut atorneqartoq silap pitsaavallaannginnera pissutaalluni utereersoq politiit ilisimatitsissutigaat, silali pitsaaneruleriarpat umiatsiat qulimiguulillu ujaasinissaminnut piareersimapput.

KNR-ip pisut malinnaavigai...