Kuummiuni tunitsiviup ammaqqinneqarnissaa Arctic Prime Fisheriesip sulissutigaa.Foto: Carl Skou

Qulaarpaa Tunumi aalisakkanik tunitsivituaq ammaqqissagunartoq

Tunumi aalisakkanik tunitsivituaasoq ukiuni marlunngulersuni matoqqagallartinneqarmat, aalisartut periarfissaarutivipput. Maannali neriuutissaqalerpoq. Tunitsiviummi, Arctic Prime Fisheriesimit pigineqartup, ammaqqinneqarnissaa maanna sulissutigineqalerpoq.

Tunitsivissaaleqineq peqqutaalluni, tunumi aalisartut kaasimaaginnalerput.

- Ajoraluartumik sulerinngillat, taamatut oqarluaannaraanni. Soorunami namminneq atugassaminnik, soorlu nerisassaminnik allatigullu, namminneq aalisartarput. Soorlu ullumikkut saarulliunerusut. Ukuluunniit qalerallit annerusumik sammineq ajorpaat akeqanngimmata, imaluunniit tunitsivissaqanngimmata.

Kuummiuni Sermiligaamilu nunaqarfinni aqutsisuni siulittaasoq, Boas Boassen, taama oqarpoq.

Tasiilap nunaqarfigisaani Kuummiuni, aalisakkanik tunitsivik bakteerianik nassaarfigineqarmat, septembarimi 2014-imi matuneqarallarpoq.

Matusigallarnerup kingunerisaanik aalisartut atugarisaat ajornerulerput.

Paasisat piviusut

Qulaarpaa sisamanngorpat aallakaatinneqalerpat Tunu pillugu oqallitsitsisoqassaaq.

  • Innuttaasut nalunaarsorsimaneri kingulliit, aggustip 26-ani 2016-imi saqqummersinneqartut malillugit, 3.295-it Tunumi najugaqarput. Innuttaasut illoqarfinni marlunni najugaqarfinnilu arfineq-marlunni assigiinngitsuni aggulussimapput
  • 2014-imi Tasiilami eqqaanilu innuttaasut agguaqatigiissillugu ukiumut 152.400 koruuninik isertitaqarsimapput. Ittoqqortoormiini 167.778 koruuninik isertitaqarsimallutik. Nuna tamakkerlugu isertitat agguaqatigiisillugit ukiumut 218.491 koruuniupput.
  • Aalisarnerup, piniarnerup nunalerinerullu iluani inuit 52-it inuussutissarsiuteqarput.
  • Sanaartornermi inuit 68-it inuussutissarsiuteqarlutik
  • 575-illu oqartussani allaffeqarfinnilu sullissivinni sulisuullutik.
  • Aalisartut tunitsivigisartagaat kisiartaasoq, Kuummiuniittoq Arcitc Prime Fisheries-imit Qaqortumi allaffeqartumit pigineqartoq ukiut aappaassaat matoqqavoq.

Najoqqutat: Nunatta naatsorsueqqissaartarfia aamma Kommuneqarfik Sermersooq.

- Pissaqarniarneq, tamakkununnga soorlu aningaasat tungaatigut kipiluttunarnerulerpoq.

Namminersorlutik Oqartussat oqaloqatigineqarput

Boas Boassen, taama oqarpoq.

Tunitsiviulli ammaqqinneqarnissaa Arctic Prime Fisheriesimit sulissutigineqarpoq, taakku Namminersorlutik Oqartussanut upernaaq attaveqarput, tunitsiviullu ammaqqinneqarnissaanut periarfissat misissorneqarlutik. Qaquguli ammassanersoq suli nalunarpoq.

Tamanna nalorninalaarpoq. Ukiarpallaartinnagu ammaqqinnissaa neriuutigaarput, tamanna siunniupparput.

Arctic Prime Fisheriesimi ataqatigiissaarisoq, Ole Aggo Markussen KNR-imut taama oqarpoq.

Tunitsiviup qerigasuartitsivia qaleralinnik 300 tonsinik imaqarsinnaavoq. Tunitsivillu annaasaqaataanngitsumik ingerlanneqassappat, qalerallit ikinnerpaamik 150 tonsit ukiumut tulaanneqartarnissaat piginnittut piumasaraat.

Aalisartut atortui nutarsartariaqarput

Tunumili aalisartut amerlanngimmata taama amerlatigisunik tulaassisinnaanngillat. Tamannalu Arctic Prime Fisheriesimit ilalerneqarpoq.

- Tunumi aalisartut atortuisa nutarsartariaqalerneri unammillernarpoq. Taamaammat angallammik aalisaqataasinnaasumik peqalernissatsinnik, ingerlatsinermilu tapertaasinnaasumik piumasaqarpugut.

Arctic Prime Fisheriesimi ataqatigiissaarisoq, Ole Aggo Markussen taama KNR-imut oqarpoq.

Arctic Prime Fisheriesili tunumi annerusumik ningittagarsortumik aalisariuteqalernissamut piumasaqarnera, Namminersorlutik Oqartussat itigartitsissutigaat.

Ilanngutassiaq Qulaarpaamut sisamanngorpat aallakaatinneqartussamut tunngatillugu suliaavoq. Oqallinneq kalaallisut toqqaannartumik sisamanngornermi nalunaaqutaq arfineq-pingasut qeqqanut qallunaatullu qulingiluanut tanneq arfineq-marlunut aallakaatinneqassaaq.

Kommentarer



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Live flyinformation ank./afg.

TTV s 350 Aktuel TV oversigt

TTV s 610 Aktuel Radio oversigt