Isumaginninnikkut akisussaaffiit kivissinnaanngippatigit Naalakkersuisut tigusinnaalissavaat

- Kommunit assigiinngitsunik peqquteqarlutik suliaq uninngatiinnarpassuk, immaqa isummernaveersaarfigalugu suliarinaguluunniit, taava Naalakkersuisut akisussaaffik tigusinnaavaat iliuuseqarlutillu, Isumaginninnermut naalakkersuisoq Martha Lund Olsen oqarpoq.

Aamma atuaruk Naalakkersuisut kommunit nakkutiginerulerniarpaat

Inatsimut allannguutissatut siunnersuutigineqartoq isumaginninnermut tunngatillugu kommunini ajornartorsiutigineqartartunik aaqqiinavianngitsoq oqaaseqartartut ilaat isumaqarput.

Kommunit namminersornertik annaassagaat Inuit Ataqatigiit oqaaseqartartuata Agathe Fontainip aarleraa.
Inatsimmi atuutsinneqalissappat kommunit Naalakkersuisunit akisussaaffiiagaasalersinnaapput, soorlu assersuutigalugu meeqqat atuarfianni amerlavallaat angusinngitsooraangata, Agathe Fontain oqarpoq:

- Taassuma iluani annertoorujussuarmik innarliisoqarsinnaavoq. Taamaammat isumaqarpugut eqqartorluaqqaartariaqaripput, aamma ataatsimiititaliami. Kaammattuutigivara kommunit Namminersorlutillu Oqartussat oqaloqatigeeqqittariaqartut.

Aamma atuaruk Unioqqutitsineq isumaginninnermik sulialinnut attuumassuteqanngitsoq

Kommuninilu Nakkutilliisuutitat nakkutilliiartortarnerat ukiut sisamakkaarunnaarluni ukiut tamaasa pisalissasoq, Agathe Fontain inassuteqarpoq.

Nuna tamakkerlugu ajornartoorfimmi suliaqartoqartariaqartoq

Inatsisartuni ilaasortap attaviitsup Naaja Nathanielsenip Inuit Ataqatigiit isumaqatigalugit oqaatigaa isumaginninnermut siunnersortit suliaat ataasiakkaat ikinnerulersillugit akissarsiaat qaffanneqartariaqartut. Meeqqat inuusuttullu sumiginnarneqartarneri pillugit suliat amerlavallaartarmata suliassarpassuit allat ukiorpassuarni uninngaatiinnarneqarput. 

Taammaammat nuna tamakkerlugu ajornartoorfimmi suliaqartoqartariaqartoq, Naaja Nathanielsen isumaqarpoq.
Taannami isumaqarpoq, Martha Lund Olsenip siunnersuutaa aaqqiiniapallannerusoq. 

- Inooriaatsit kingornutarineqaqqinnginnissaat matumani aamma pivarput. Meeqqat atuarfianni nukarlerni ilinniartitsisut sooruna amerlanerunngitsut? Peqqinnissaqarfik tamarmiusoq meeqqanik angerlarsimaffimminni ajornartorsiortunik naammattuuisinnaallunilu isumaginnissinnaalluni aaqqissugaava? Inuusuttut suliffeqarnatik angalaaginnartut sooruna taamak amerlatigisut? Ajornartorsiutit taama angitigisut Piareersarfiit naammanngillat. Ajornartorsiutaavoq naaffeqanngitsoq, Naaja Nathanielsen oqarpoq.

Aamma atuaruk Martha Lund Olsen: Kommunit isumaginninnermut tunngasut akisussaaffigaat

Piaartumilli iliuuseqartoqartariaqartoq naalakkersuisoq isumaqarpoq.

-Isumaqarpunga uani pingaaruteqartorujussuusoq ilisimasaqarutta, soorlu meeqqat allalluunniit ajornartorsiuteqartut, inatsisit naapertorlugit ikiorserneqanngitsut, taakkua taamaattoqannginneranut aporfiit aaqqittariaqarigut. Imaanngitsoq ataatsimiititaliarsuarnik sanassasugut. Taakkualu ukiuni marlunni-pingasuni eqqarsaatersuuteqassapput tamakkiisumik qanoq aaqqiisoqarnissarput. Isumaqarpunga taanna utaqqisinnaanngikkipput ilisimagutsigut ajornartorsiut sumi aallaaveqartoq, naalakkersuisoq Martha Lund Olsen oqarpoq. 

Partii Naleraq isumaqarpoq kommunit akisussaaffiinik arsaarnagit Namminersorlutik Oqartussallu suleqatigiittariaqartut.

- Kommunit eqqunngitsumik ingerlatsippata akuliussinnaaneq apeqqusinngilluinnarparput taamattoqarsimappallu akuliuffigineqarsinnaanerat pisussusissamisoorpoq. Kisiannili oqartussaaffimmik arsaarinnissinnaaneq akuerinngilarput, kommunit nammineerlutik inatsimillu illersugaallutik ingerlatsinerat ataqqineqartariaqarmat, Hans Enoksen allappoq.