Foto: Venstre/Pressefoto

Danskit nunanut allanut tunngasunut ministeriat siumut isigaluni suliniartoq

Danmarkip nunanut allanut tunngasunut ministerertaava Kristian Jensen, Helle Thorningip ministeriunerunerata nalaani pisimasut eqqarsaatiginagit siumut isigaluni suliniarpoq. Pituffimmut kiffartuussinissamik isumaqatigiissut Kristian Jensenip matumani eqqarsaatigaa.

Taamaammat Pituffimmi kiffartuussinermut suliariumannittussarsiuussinermut atatillugu allakkat takussutissat tamanut  saqqummiunneqarnissaat naatsorsuutigineqassanngilaq, naak Venstret Folketingimut qinersisoqarnissaanut atatillugu taama piumasaqaateqaraluartut.

Kristian Jensen Nunatsinni ulluni makkunani tikeraarpoq, ilaatigullu Nunanut allanut tunngasunut naalakkersuisoq Vittus Qujaukitsoq ataatsimeeqatigalugu.

- Siornatigut naalakkersuisuusut isornartorsiorusunngilakka, tamannami ileqqupalaajuvoq. Tassami paasissutissanik inuit suliamut atatillugu attuumassuteqartut peqataaffigisinnaanngisaannik nassuiaateqarfigisinnaanngisaannillu saqqummiussissalluni pissusissamisuunngilaq, Kristian Jensen KNR-imut oqarpoq.

AAMMA ATUARUK Pituffik pillugu ammasumik ingerlatsisoqarnissaanik Venstre piumasaqartoq

Pituffimmi kiffartuussinissamik isumaqatigiissutip nutaap, assersuutigalugu Greenland Contractorsip kiffartuussinissaminik annaasaqarneranik kinguneqartup, atuutsinneqarsinnaannginnera, USA-mi eqqartuussiviup naammagittaalliuteqartarfiup ukioq manna siusinnerusukkut aalajangerpaa. Eqqartuussiviup taassuma aalajangiinera aallaavigalugu suliaq naammassineqarsimasutut nalilerneqarsinnaasoq, Krisian Jensenip oqaatigaa:

- Isumaqatigiissutip taassuma atuussinnaannginneranik aalajangiisoqarneratigut, nutaamik isumaqatigiissusiornissap tungaanut suliat atuukkunnaarsinneqartut isumaqarpunga, Kristian Jensen oqarpoq.

Pituffimmi kiffartuussinissamik isumaqatigiissut atuutilersussaq, Illersoqatigiinnissaq pillugu Nunatta, Danmarkip USA-llu akornanni isumaqatigiissut aallaavigalugu suliarineqassasoq, Kristian Jensenip maanna kissaatigaa.



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl