VIDEO Aluu Airlines timmisartornerup akikinnerulernissaanik neriuuteqalersitsivoq

Greenland Express Nunatsinni illoqarfiit arlallit akornanni aasap naajartulernerani timmisartuussilernissani naatsorsuutigalugu nalunaaruteqareersoq, Nunatsinni timmisartortitseqatigiiffiit pingajuata qaqugu timmisartuussilissanerluni oqaatigisinnaanngikkallarpaa.

- Trafikstyrelsip akuereqqaartussaammatigut Nunatsinni timminissatsinnut, Aluu Airlinesimi niuernermi pisortaq, Kuno Fencker, KNR-imut taama oqarpoq.

Timmisartortitseqatigiiffiit nutaajunersaat Nuup Ilulissallu akornanni timmisartuussisarnissami saniatigut Danmarkimut Islandimullu timmisartuussisarnissaminik pilersaaruteqarpoq. Aluu Airlinesip, Air Greenlandip, Greenland Expressip Air Icelandillu unammilleqatigiilernerisa timmisartornerup akikinnerulerneranik kinguneqarnissaaa neriuutigineqarpoq.

- Pilersaarutigigatsigu Nuumminngaanniit Keflavikimut, siumut utimullu, 4000 kr. ataallugit neqeroorutigisinnaassallugu. Taavalu aamma neqeroorutigisinnaassuarput, assersuutigalugu Ilulissaninngaanniit Nuummut, siumut utimullu.  Akigititassagut eqqarsaatigissagaanni neriuutigaarput inuit aamma angalarusunnerulissasut, ingasammik inuit isertitaat eqqarsaatigissagaanni, inuinnaat nunatsinni immaqa akissaqartarnikuunngitsut akissaqalersinnaassasut. Taanna neriuutigisorujussuuarput, Kuno Fencker oqarpoq.

Aamma atuaruk Aluu Airlines Greenland Express Groupilu timmisartuussinissamut akuerineqartut

 

Unammillertigisaminnut attuumassuteqannginnerartut

Angalarusuttullu billetsinik akikitsunik piserusuttut imaaginnavissimagunarput. Aluu Airlinesimmi Facebookimi quppernerani erseqqissaatigineqarpoq billetsinik tuniniaaneq suli aallartinneqarsimanngimmat aammalu unammillertigisaminut Greenland Expressimut attuumassuteqarani.

- Erseqqarissaatigilaassavarput Aluu Airlines suli bilitsinik tuniniaanngimmat. Greenland Express Group tuniniaanerat uangutsinnut attuumassuteqanngilaq, timmisartortitseqatigiiffik taama allappoq.

Aamma atuaruk Greenland Express nunatta iluani timmisartuussisinnaanngortoq

Naalakkersusut apriilip qulingani aalajangerput Aluu Airlines aamma Greenland Express Kalaallit Nunatta iluani niuernermik aallaavilimmik ilaasunik timmisartuussisinnaanissaminnut naalakkersuinikkut akuersissummik tunineqassasut.



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl