Allatut iliortoqassappat isumaqatigiinniaqqittariaqassaagut

Arctic Umiaq Linep tuniniarneqarneranut atatillugu isumaqatigiinniarnerit ingerlaneranni naalakkersuisuungallaqataasut Inuit Ataqatigiit maanna piumasaqalerput umiarsuaatileqatigiiffimminik pisisussatut isumaqatigiinniarfigineqartut Arctic Travel Group angallassinissamut pilersaarutaat annertusisariaqartoq, angallassinissaminnut pilersaarumminnut nunaqarfiit sisamat illoqarfiillu marluk ilannguttariaqaraat. Tamaattoqassappat nutaamik isumaqatigiinniartoqartariqalissaaq taama isumaqarput naalakkersuisuungallartut siulittaasuat Hans Enoksen kiisalu pisiniartut Arctic Travel Group. Siullermik Naalakkersuisuungallartut siulittaasuat ima akivoq:

- Kiffartuutassatta sapinngisamik pitsaasumik kiffartuunneqarnissaat tammata soqutigisaraarput. Kisianni isumaqatigiinniarnerup ingerlanerani piumasat ilanngunneqassappata , taava nutaamik aallaqqaataaniit isumaqatigiinniartoqartariaqalissaaq.

Aningaasanik arlalialunnik naleqarnissaa ilimanarluinnarmat. Taamaammat allannguiniarnissaq tunngaviatigut isumaqatiginngilara.

Hans Enoksen erseqqissaavoq allannguinissaq IA-kkut kissaatigisimagunikku aallaqqaataaniilli ilanngussimasariaqaraluaraat, massakkut qinersinerup tikilluinnalernerani allatorluinnaq isummersoratik.

Inatsisartunngortussat IA-kkunnut isumaqataassagaluarunik taava aningaasaliissutissanik ujarlertariaqalissasut Hans Enoksen oqarpoq.

- Taavalu taamaattoqareerpat aatsaat isumaqatigiinniarnerit nutaamik aallarteqqinneqartariaqassapput. Qularnanngilaq allannguiniarneq sunniuteqangaatsiartussaammat pisisussat immaqa allatut isummersinnaanerat aamma qanittuarakasiuvoq, kisianni neriuppunga taamatut pisoqassanngitsoq, tapiissititaqanngitsumik sapinngisamik innuttaasunut ajunnginnerpaamik kiffartuussinissaq aammalu nunatta avataaneersunik aingaasaliisussanik annertunerpaanik pissarsinissaq aallaavigalugu isumaqarpunga sulinerput ingerlaqqittariaqartoq.

Naalakkersuisuungallartut siulittaasuat Hans Enoksen taama oqarpoq. Pilersaarutigeriikkamik qaavatigut allanik angallassissaq immikkut akeqartariaqassasoq, Profil Rejsep pisortaa Jan Shapiro, Arctic Travel Groupimik ingerlatseqataasoq oqarpoq.

- Pisinermi akip qaavatigut angallassisarnissamik piumasaqartoqarneq unammilleqatigiinnerup anersaavanut naleqqutinngilaq, taamaattumik pisinissamik isumaqatigiissutip saniatigut siunnersuutissat allat immikkut akilerneqartariaqassapput Shapiro oqarpoq. Arctic Umiaq Linemik pisinissartik IA-p piumasaqaataanik kingaallassarneqassappat aappaagu angallassinissamut pilersaarusiornermut ussassaarinermut tunianiaanissamullu assut ajornartorsiortitsilissasoq Jan Shapiro erseqqissaavoq.



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Flyinformation ankomst/afgang

TTV s 350 TV oversigt

TTV s 610 Radio oversigt