Enoksen: Piumasartik attatiinnassappassuk qinersisoqaqqaartariaqassaaq

Siumup aamma Naalakkersuisut siulittaasuat Hans Enoksen Radioavisimut ippassaq oqarpoq, naalakkersuisooqatigiit naalakkersuisunngortitassanik nalilersueqatigiittalernissaannik Inuit Ataqatigiit piumasarisaat pissusissamisuuginnartoq. Atuagagdliutit-nulli ullumi saqqummertunut oqarpoq, nalilersueqatigiittalernissaq qinersereernerup kingorna aatsaat atorsinnaassasoq.

Hans Enoksen tamanna pillugu ima nassuiaavoq:

- Oqaloqatigiittassagutta ajunngivippoq, kisianni nutaamik aallartissagutta taava qinersineq nutaaq uanga aallaavigissavara. Hans Enoksen oqarpoq.

Inuit Ataqatigiit piumasaqarnerannut taava qanoq akissuteqassavit ?

- Qinersineq nutaaq aallaavigalugu isumaqatigiinniarnerit ingerlassapput, taamatut pisoqassappat. Unali naqissuseeqatigiittarnissarput aamma ajunngilluinnaqqissaarpoq. Naalakkersuisut siulittaasuat nassuiaavoq.

Imaappa Inuit Ataqatigiit piumasarisaat Siumup siulittaasuatut maanna akuerisinnaanngikkit ?

- Josef Motzfeldtilu oqaloqatigiissaavut, siunnerfigullu ersarissarlugit. Tamanna ersarissumik paasilluarumaarparsi. Hans Enoksen oqarpoq.

Hans Enoksen aperineqarami, Siumumi ilaasortat ilaasa qinersinissamik piumasaqarsimammata sunniuteqarsimanersut, ima akivoq:

- Naagga, aamma qinerserusunngitsorpassuaqarpoq. Isumaqarpunga aamma taakku tusartinneqartariaqaraluartut. Inuit Ataqatigiit piumasartik attatiinnassappassuk qanoq pisoqassava ?

- Josef Motzfeldtilu oqaloqatigiikkumaarpugut, taava paasiumaarparsi, naalakkersuisut siulittaasuat oqarpoq.

Naalakkersuinermi periutsit nutaat eqqunneqassappata qinersisoqaqqaartariaqarnerarlugu Hans Enoksenip oqarnera, Inuit Ataqatigiit siulittaasuata Josef Motzfeldtip ima akissuteqarfigaa:

- Isummani allanngortissimassappagu sumik toqqammaveqarluni taamaassimanersoq paaseqqaarlugu uagut siulersuisuunigut nalilersuisariaqarput. Josef Motzfeldt oqarpoq.

Josef Motzfeldt ippassaani oqarpoq, piumasartik angussanngikkunikku naalakkersuisooqataajumajunnaassallutik, isummaminnik allanngortitsisimanerlutik ?

- Tassami tunngaviusumik isumaqatigiissutaasinnaasut taamaattut isumaqatigiissutigisinnaanngikkutsigit qinersinermik kinguneqassaaq. IA-p siulittaasua erseqqissaavoq, nangipporlu:

- Erseqqissassavara, illua´tungitta naalakkersuisussatut piukkussaat aalajangersaaffigisinnaannginnatsigit. Naalakkersuisulli nukittunerpaamik toqqammaveqarlutik inuttalersorneqassappata naggataatigut isumaqatigiinniartarnissaq avaqqussinnaanngilarput. Josef Motzfeldt nassuiaavoq.

Siumut Inuit Ataqatigiillu isumaqatigiissinnaanngippatami ?

- Isumaqatigiissinnaanngikkaanni taava taanna naalakkersuinikkut toqqammaviusinnaanngilaq. IA-p siulittaasua oqarpoq.

Inatsisartunut aappaagu qinersisoqassaaq, naalakkersuisunik nutaanik toqqaanissaq qanoq akilersinnaatiginersoq Josef Motzfeldt aperineqarami akivoq, tamakku nalilersugassat ilagiumaaraat.

- Suliassat annertuut naalakkersuisut maanna sinneruttut ingerlassinnaaneraat imaluunnit nutaanik ikkussinikkut suleriutsit nassuiarnissaat nalilersoqqissaartariaqarparput. Kisianni suliassat annertuujummata patajaatsunik, suleqataasinnaasunik naalakkersuisullu sulinerannut nukittorsaaqataasinnaasunik inuttaliinissaq aatsaat taama pisariaqartigilerpoq. Kisianni qinersinermik inerneqarsinnaasumik isikkoqartoqanngikkallarpoq. Josef Motzfeldt oqarpoq.

Josef Motzfeldt aamma oqarpoq, naalakkersuisut aqagu ataatsimiinnissaat naatsorsuutigalugu.

Kommentarer



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Flyinformation ankomst/afgang

TTV s 350 TV oversigt

TTV s 610 Radio oversigt