Naliliisartut: Partiit mikinerit tupaallatsitsinnginnerat kinguneqassaaq

Folketingimut qinersinissaq aqagumut pisussanngortorlu qinersisartunik isumasiuineq tutsuiginartoq takkuppoq. Qinersisartut isumaat malillugu qallunaat oqariartaasiat tassunga naleqqulluarpoq: 'suut pigalutigit nalunngilarput naluarpulli aqagu suna pissarsiariumaarnerlutigu'.

Isumasiuinermi Inuit Ataqatigiit Siumullu taaneqarnerpaasimasut, Demokraatinit Atassutikkunnillu ajorsartinneqarsinnaanngitsutut isikkoqarput. Partiit taakku allaanerusumik oqariartuuteqannginnerat tamassunnga pissutaasimasoq, qinersisarnernik ilisimasaqarluartut marluk, Sten Lund aamma Henrik Skydsberg naliliipput.
Folketingimut qinersinerni kingullerni pingasuni, Nunatsinni partiit anginerit isertitaqartarput, maannalu aamma taamaattoqartussaasutut isikkoqarluni.

Isumasiuinermik suliaqartartoq, HS Analyse aviisit Sermitsiaq AG suleqatigalugit inerniliipput, Inuit Ataqatigiit aamma Siumut folketingimi issiatitaqaleqqissasut. Taannaannaanngilarli, partiit angisuut taakku marluk aamma taaneqarneri 2007-mut naleqqiullugit amerleriartussatut ilimagineqarluni.

Qinersisartunik isumasiuinerup takutippaa, Demokraatit 2 procentimik kinguariartussaasut Atassullu 4 procentimik.

- Partiinut angisuunut naleqqiullugit, Demokraatit Atassullu partiiupput taasinerni taanikinnerusartut. Folketingimi issiatitaqalerniarunik taava nutaaliortariaqarput, HS Analysemi pisortaq, Henrik Skydsberg oqarpoq.
Nangillunilu taanna ima oqarpoq:

- Demokraatit Atassullu qineqqusaarnerni tupaallatsitsisimanngillat, taamaattumik taakku isertitaqanngitsoortussatut taasisartunit naliliiffigineqarput, Henrik Skydsberg oqarpoq.

Folketingimi killilersorneqanngitsumik oqartussaaqataanerulernissamik isumaqatigiinniarsinnaatitaanermik Demokraatit qineqqusaarutaat taasisartunik tigooraasimanngilaq, taamatuttaaq Atassutip Venstrenik suleqateqarnerminnik qimatserusunnginnerat allannguisimanani, Henrik Skydsberg naliliivoq.

- Kalaallit Nunaannut tunngasunik Folketingimi oqallinnerni, qallunaat partiivisa saamerliuneri talerpilliunerilu apeqaqutaatsinneqarneq ajortut ilisimaneqarpoq. Taamaattumik Nunatsinni partiit saamerlernik talerperlernillu suleqatiginniniarneri taasisartunik allanngortitsisimanngilaq, Henrik Skydsberg oqarpoq.

Taassuma taama oqarnera politikkikkut oqaaseqartartumit, Sten Lundimit isumaqatigineqarpoq.

- Qinersisartut toqqissisimanermik ujartuisutut isikkoqarput, tassami nalunngilaat suna pigereerlugu nalulluguli suna pissanerlugu, Politikkikkut naliliisartoq Sten Lund oqarpoq.

Kommentarer



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl

KNR TV: TekstTV

Tjek information her:

TTV s 113 Dagligt opdaterede nyheder

TTV s 400 Flyinformation ankomst/afgang

TTV s 350 TV oversigt

TTV s 610 Radio oversigt