Parisimi napparsimmaviit coronavirusimik tunillanneqarsimasunik ulikkaaqqajaasut

Parisimi napparsimmavinni siniffiit quliugaangata qulingiluat coronavirusimik tunillanneqarsimasunit sapaatit-akunnerata tulliuttup ingerlanerani uninngavigineqaratarsinnaapput.

Parisimi napparsimmaviit 39-t pisortaat, Martin Hirsch, taama oqarpoq.

- Coronavirusimik tunillanneqarsimasut 800-t 1000-llu akornanniittut peruluttut innaanni oktobarip ulluisa 24-anni uninngaratarsinnaapput, imaluunniit napparsimmavinni inissat 70 aamma 90 procentiisa missaat coronavirusimik tunillanneqarsimasunit uninngavigineqassapput, napparsimmaviit pisortaat Hirsch oqarpoq.

AAMMA ATUARUK Parisimi imerniartarfiit coronavirusup Frankrigimi tuniluutileqqinnerani matoqqassasut

Coronavirusip siaruatsaaliornissaanut killilersuinerit nutaat Frankrigimi oqartussanit sumiiffinni assigiinngitsuni piareersarneqaleruttorput.

Frankrigip præsidentiata, Emmanuel Macronip, pingasunngornermi unnukkut oqalugiarnissaa ilimagineqarpoq, killilersuinerit pillugit nalunaaruteqarnissaa ilimagineqarluni.

Parisimi illoqarfinnilu eqqorneqarsimasuni allani innuttaasut aneqqusaajunnaarsinneqarnissaasa Macronimit nalunaarutigineqassasoq ilimagigitsik, Frankrigimi nutaarsiassaqartitsiviit arlallit allapput.

Frankrigimi inuit coronavirusimik tunillanneqarsimasut arfininngormat nalunaaquttap akunneri 24-t ingerlaneranni 27.000-ngajaapput.