Politikerit katersuussinnaapput: Kalaallimmi atuakkiortut katersuussinnaappat?
Politikerit kommunimiit kommunimut killeqarfiit akimorlugit katerissinnaasut, timersortartut allallu taamaalioqqusaanngillat.
Tassami nalunaarummi katersuunnernut naalakkersuinikkut allatulluunniit isummersornissamik siunertalinnut atuutinngillat.
Nalunaarut kikkunnut atuunnersoq kikkunnullu atuutinnginnersoq ersarissumik allaqanngitsoq, Kalaallit atuakkiortut siulittaasuat isumaqarpoq.
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
- Isumaqarpunga ersernerluttorujussuusoq, paasiuminaallunilu, kalaallit atuakkiortut siulittaasuat, Juaaka Lyberth oqarpoq.
- Pujorsiuteqarluarluni aatsaat ujaasisoqarsinnaavoq paasineqarsinnaallunilu suut akuerisaanersut suullu akuerisaannginnersut.
AAMMA ATUARUK Kim Kielsen: Ukioq manna pissartanngorniuttoqassanngilaq
Coronami pillugu malittarisassat maanna atuuttut naapertorlugit soorlu aaqqissuussinerit, susassaqartitsinerit assigisaallu kommunit killeqarfiinik akimuisut inerteqqutaapput. Inerteqqutit 2021-mi januaarip 31-ata tungaanut atortussanngortinneqartut, Naalakkersuisut siulittaasuata, Kim Kielsenip tusagassiortunik katersortitsinermi oqaatigaa.
Ilaatigut nunatsinni pissartanngorniutivinnissat unitsinneqarnerannik tamanna kinguneqarpoq.
AAMMA ATUARUK Timersoqatigiit katuffiannit GM suli neriuutigineqarpoq: Misileeqattaartariaqarpugut
- Uani inuit ataasiakkaat peqqissusaat salliutinneqarpoq. Aamma upalungaarsimaneq najoqqutaralugu tamakku assigiinngitsut peqqutaallutik taamatut aalajangerneq pivoq, Naalakkersuisut siulittaasuat, Kim Kielsen tallimanngormat oqarpoq.
Katersuussinnaanermulli maleruaqqusat politikerinut atuutsinngitsut nalunaarusiami allaqqavoq.
Kalaallit atuakkiortut aamma septembarip aallartilaarnerani Nuummi ataatsimeersuarlutillu isumasioqatigiittussaagaluartut, maanna nalorninartumik inissisimalersut Juaaka Lyberth KNR-imut oqarpoq.
AAMMA ATUARUK Tamaat isigalugu: Assammik arsarnermi, volleymi, taekwondomi pissartanngorniuttoqarnissaa suli neriuutigineqartoq
Kalaallit atuakkiortut septembarip pingajuanniit tallimaat ilanngullugu Nuummi ataatsimeersuarlutillu isumasioqatigiittussaagaluarput.
Peqatigiiffiup ilaasortai nunatsinni kommuninit assigiinngitsuneersuupput ilaallu Danmarkiminngaanneersuullutik.
Tamannalu piviusunngortinneqarsinnaanersoq siulittaasup nalornissutigaa.
- Taava apeqqutaalerpoq, kalaallit atuakkiortut ataatsimeersuarnissaat qanoq isummerfigineqassava? Suua; politikikkut isummersornerua immaqaluunniit isummersornernut assigiinngitsunut siunertaqarluni katersuunnerua? Immaqaluunniit pisortat qanoq nassuiassavaat?
AAMMA ATUARUK Katersuussinnaanermut malittarisassat januaari ilanngullugu atuutissasut
Peqatigiiffimmi ataatsimeersuarnerup nalaani aamma isumasioqatigiittussaagaluarput, maleruaqqusanili taamaaliornissaq inerteqqutaavoq.
Akerlianilli ataatsimeersuartoqarsinnaanera paatsuungassutigineqarpoq.
- Pisussat ilaannut kommuniniit kommuninut aggersinnaajunnaarsitaaneq pisussalli ilaannaannut aggersinnaatitaalluni, tamanna nalorninartorsiornartorujussuuvoq .
Tassunga tunngatillugu Naalakkersuisut siulittaasuat, Kim Kielsen KNR-imiit oqaaseqartinniarsaraarput.
