Garmin inatsisaatsuliorlutik qarasaasianut isertartunit millioninik akileeqquneqartoq
Ingerlatseqatigiiffiup Garminip qarasaasiai unioqqutitsilluni sapaatit akunnerata siulianili iserfigineqarsimasut it-mik atortuni ammarteqqinniarunigit 64 millionit koruuninik akiliisariaqassaaq.
Qarasaasiat unioqqutitsilluni iserfigineqarmata, inuit Garminip GPS-imik atortuinik atortut ilaatigut arpattartut sikkilertartullu nunarsuaq tamakkerlugu millionikkuutaat eqqorneqarput.
Tusagassiuut Computerworld taama allappoq.
Qarasaasianut isertortumik isertartoqatigiit Ruslandimeersut Evil Corps qarasaasianut unioqqutitsilluni isernermut akisussaasuunerarpoq, Garminillu qarasaasiaminut iseqqissinnaassaguni akiliinissaanik maanna piumasaqarluni.
Ingerlatseqatigiiffimmeersut qarasaasianut unioqqutitsilluni isertoqarnera pissutigalugu qarasaasiaakkut aaqqissuussat ilaannut isersinnaanatik nalunaarput.
- Qarasaasiatsinnut aaqqissuussat sapinngisamik sukkanerpaamik aaqqinnissaat sulissutigaarput, pisarissersuinermullu utoqqatserluta, Garmin nittartakkamini allappoq.
Atuisartut paasissutissaataat "sulerinermut, akiliinermut inummullu paasissutissat allat" qarasaasiat atorsinnaajunnaarnerannit sunnerneqarpasinngitsut, Garminip paasissutissiissutigaa.
/Ritzau
