Ersinngitsunik innarluutillit kattuffinnit ukkanneqalersut

Inuit autismemik innarluutillit, ADHD-rtut, naqinnernik ilisarinnissinnaanngitsut tarnimikkullu nanertuuteqartut sammineqarnerulernissaat pisariaqartinneqarpoq.

Inuit assigiinngitsunik ersinngitsunik innarluutillit paasisaqarfigineqarnerunissaat anguniarlugu ilaatigut videolianik paasititsiniaanerit takutinneqassapput.

AAMMA ATUARUK Innarluutillit peqatigiiffiata siulittaasua: Kalaallinut naqinnernik ilisarinnissinnaanngitsunut misiliummik inerisaasoqarli

Nunatsinni Inuit Innarluutillit Kattuffiat NIIK aamma Inuit innarluutillit illersuisuiat tusagassiuutinut taama nalunaaruteqarput.

Inuit innarluutillit allatuulli inuuneqarsinnaatitaasariaqartut NIIK-imi Siulittaasoq, Anders Meilvang, isumaqarpoq.

- Inuiaqatigiit soqutiginnillutik peqataatitserusussuseqarlutillu aaqqissuunneqarpat, aatsaat taamaaliortoqarsinnaavoq. Taamaattoqassappallu annerusumik paasisimasaqarnissaq ilisimasaqarnissarlu pisariaqarpoq. Ersinngitsunik innarluuteqarnerit assigiinngitsorpassuusinnaasut aamma inuit innarluutillit inuttulli allatuulli assigiinngitsorpassuusinnaanerat paasisitsiniaalluni videoliani takutinniarneqassapput.

- Uani suliniummi inuit innarluutillit qitiusumik inuiaqatigiinni pingaartinneqalerumaartut NIIK-miit neriuutigaarput. Inuit innarluutillit inuunertik anguniakkatillu pillugit sassarlutik oqaluttuarsinnalernissaannut paasititsiniutit uku inuiaqatigiit kaammattueqataarusussuseqalernissaannik kinguneqassasut neriuutigaarput, Anders Meilvang oqarpoq.

Paasititsiniaanerit isiginnittariaatsinut allannguissapput

Videoliat Sisimiuni, Nuummi Qaqortumilu immiunneqassapput.

Ersinngitsunik innarluutillit pillugit videoliat ukiaru sapaatip akunneranni 41-mi saqqummersinneqarnissaa naatsorsuutigineqarpoq.

Inunnut innarluutilinnut innuttaasut isiginnittariaasaat uani paasititsiniaanerni allanngortinneqassasoq, inuit innarluutillit illersuisuat, Christina Johnsenip naqissuserpaa.

- Inuiaqatigiit inuit innarluutillit assigiinngiiaaqisut pillugit annerusumik paasissutissiiffigisarneratigut inuit pigiliutiinnakkamik isiginnittariaasiat allanngortissavarput, Christina Johnsen allappoq.

Paasititsiniaanermi Namminersorlutik Oqartussat aningaasaliisuupput.

AAMMA ATUARUK Qaanaaq innarluutillit illersuisuannit tikeraarngaarneqalertoq