Tuluit Spaniami takornariarsimasut angerlarsimaannarallartarnissaannik maleruagassiortut
Tuiluit allallu Spaniamut takornariarsimappata, tuluit nunaannut uternerminni sapaatip akunnerini marlunnik angerlarsimaannaqqusaasalerput.
Tuluit naalagaaffiat arfininngornermi taama nalunaartuteqarput. Spaniami coronamik tunillatsissimasut nalunaarsorneqartut amerliartoqqilernerata kingorna taama aalajangiisoqarpoq.
AAMMA ATUARUK Nanortalimmi tunillatsittoqarneranut tunngatillugu nakorsaaneq eqqissisaavoq
Peqqussutit ullumi sapaammi atuutilerput. Tassalu tuluit allalluunnii Spaniemut tikittussat tamarmik sapaatip akunnerini marlunnik angerlarsimaannaqqaassapput.
Spaniap nunavittaanut angalannginnissaq tuluit naalagaaffiata aamma kaammattuutigaa .
Spaniap qeqertaanut, Gran Canariamut, Tenerifemut, Mallorcamut, Menorcamut Ibizamullu angalanissaq ajornartoqartinneqanngilaq.
Spaniamiissimasut Norgemut utertut aamma ulluni qulini angerlarsimaannarallartarnissaat Norgep nunanut allanut tunngasunut ministereqarfiata tallimanngormat piumasaqaatigilerpaat.
Spaniamiissimagaanni Danmarkip nunanut allanut tunngasunut ministereqarfiup angallannermi maleruaqqusat malinneqarnissaa nakkutigeqquaat. Norgimituulli taama piumasaqaateqatiginatik.
Taamatullu Spaniami nunap ilaani Cataloniap tikinneqannginnissaa Frankrigimit oqartussat kaammattuutigaa.
Spania siorna 84 millioninit takornariarneqarpoq.
Spaniami COVID-19-imik nappaateqartut maannamut katillugit 272.421-upput, marsimili coronartoqalermat inuit 28.432.it coronamik toqquteqarlutik.
