Avatangiisit

WWF-ip ataatsimeersuarneq silap pissusianut tunngasoq pitsaanerarpaa

USA-mi præsidentip Barack Obamap unammilligassat silap pissusianut tunngasut pingaarnerutilerpai. Taamaattumik issittumi ataatsimeersuartoqarnissaanut Anchorage-imi ulluni makkunani qaaqqusisuuvoq. Ataatsimeersuarnerup taaguutaa tassaavoq "Global leadership", Nunarsuaq tamakkerlugu aqutsinermik nutserneqarsinnaasoq.

Allattoq Inge S. Rasmussen, Paarnaq Hansen, Simon Uldum -

aggustip 31-at 2015 17:22

Pinngortitaq pillugu nunarsuaq tamakkerlugu suliniaqatigiiffimmi avatangiisinut tunngasunut qullersaasup John Nordbop Alaskami ataatsimeersuarneq pitsaasumik suliniutaanerarpaa:

- Nunarsuup sinneranut paasinneqqusissutaavoq, nunanut Issittumut sineriaqanngitsunut aamma. Tassa silap pissusiata allanngoriartornerata iliuuseqarfigineqarniarnerata Obamamut pingaaruteqassusaanut takussutaalluni. USA-mi innuttaasunut aamma paasinneqqusissutaavoq demokratit, Obama siuttoralugu silap pissusiata iliuuseqarfigineqarnissaanut suliniuteqarnerannik takussutaalluni, John Nordby oqarpoq.

Nunatsinnit nunat allanut tunngasunut naalakkersuisoq, Vittus Qujaukitsoq peqataavoq danskit nunanut allanut tunngasunut ministeriat, Kristian Jensen peqatigalugu.

Aamma atuaruk Issittoq pillugu Alaskami ataatsimeersuartut

Canadalli Ruslandillu nunanut allanut tunngasunut ministerii peqataassanngillat, naak Issittumut tunngatillugu nunat taakku marluk pingaarutilittut inissisimagaluartut.

USA-p præsidentia Barack Obama ataatsimeersuarneq naggaserlugu aamma peqataassaaq, tassani oqalugiassalluni. Taamaalereerpat Alaskami illoqarfinnut nunaqarfinnullu kingorna angalassaaq.