WWF: Pinngortitaq akigalugu sinneqartooruteqarneruvoq
Nunatta karsiata sinneqartooruteqarfiunera, qaleralinnik raajanillu tunisanik pissuteqarnerusoq, Naalakkersuisunit qanittukkut saqqummiunneqarpoq.
Sinneqartooruteqarnerli siuariartornerlu Naalakkersuisut uumassusilinnik ilisimatuut inassutigisaat qaangerlugit pisassiissuteqarsimanerannik pissuteqarpoq, pingaartumik qalerallit saarulliillu eqqarsaatigalugit, WWF taama isornartorsiuivoq.
- Aalisarneq Kalaallit Nunaannut taama pingaaruteqartigitillugu, pisuussutinut killeqartunut mianersornerusumik pissuseqarnissaq isumatusaarnerussaaq, John Nordbo, WWF-imi Silap pissusianut Issittumullu tunngasunut pisortaq, taama oqarpoq.
AAMMA ATUARUK Nunatta karsia sinneqartooruteqarpoq
Sinerissap qanittuani qaleralinniarnermi pisassiissutaasut Pinngortitaleriffiup ukioq manna siunnersuineranit 50 procentinik amerlanerupput.
WWF-imeersullu John Nordbop erseqqissaatigaa imaani pisuussutit qajassuuteqqissaarneqartariaqartut, Nunarput siunissami qaninnermi allatigut nutaanik aningaasarsiorfeqalersinnaanera ilisimaateqarpasinngimmat.
Aalisarnermut piniarnermullu naalakkersuisup, Karl Kristian Krusep, WWF-ip isornartorsiuinera Ritzauimut oqaaseqarfigisimanngilaa.
Folketingimulli ilaasortap Inuit Ataqatigiinneersup Aaja Chemnitz Larsenip, uumassusilinnik ilisimatuut aalisartullu ilisimasaat tunngavigalugit uumassusillit pillugit siunnersuinermut aningaasanik amerlanerusunik immikkoortitsisoqarnissaa siunnersuutigaa.