Innuttaasunik ataatsimiititsineq: WWF-p umiarsuit angallannerat oqaluuserisassanngortinniaraa
Pinngortitaq pillugu nunarsuaq tamakkerlugu suliniaqatigiiffiup Verdensnaturfondenip Nunatsinni innuttaasunik ataatsimiisitsinikkut umiarsuit imartatsinni angallanneranni sunniuteqaatigineqarsinnaasut oqaluuseritinniarpai. Ilulissani, Qeqertarsuarmi, Aasianni Nuummilu innuttaasut ataatsimiisinneqassapput.
Umiarsuit angallannerat uumassusilinnut qanoq sunniuteqartarnerat, Verdensnaturfondenip ataatsimiisitsinerit sioqqullugit misissorniarpai. Suliniaqatigiiffik tusagassiuutinut taama nalunaaruteqarpoq.
Umiarsuaq takornariartaat umiussagaluarpat
Qeqertaalummi aatsitassarsiornikkut suliniut Verdensnaturfondenip assersuutitut atorpaa. Umiarsuit tamaani suliniummut atatillugu atorneqarput, nunatttalu imartaatigut aamma ingerlaartarlutik, qilalukkat, arfiviit aarrillu uumaffigisaat aqqusaartarlugit.
Umiarsuup takornariartaatip Qeqertarsuup avataani ikkarlunnera Verdensnaturfondenip aamma assersuutigaa, takornariartaat uuliamik maqisoorfiusuusaartinneqarluni.
Pissutsit tamakku oqaluuserineqanngippallaartut Verdensnaturfonden isumaqarpoq, innuttaasullu akornanni amerlasuut ataatsimiinnernut peqaanissaat suliniaqatigiiffiup neriuutigaa, politikerit tamanna pillugu aamma eqeersimaarnerulernissaat neriuutaalluni.
Illoqarfiit sisamat
Verdensnaturfondenip nunatsinni innuttaasunik ataatsimiisitsinerat siulleq Ilulissani septembarip arfineq-aappaani nal. 19.00-21.30 pissaaq. Ataatsimiititsineq Perorsaanermik Ilinniarfimmi, Marralinnguaq 40-mi ingerlanneqassaaq.
Qeqertarsuaq: Arfininngornermi septembarip qulingiluaani nal. 13.00-16.00 Qeqertarsuup Katersortarfiani.
Aasiaat: Ataasinngornermi septembarip aqqarngani nal. 19.00-21.30 Aasiaat Katersortarfiani.
Nuuk: Katuami sisamanngornermi septembarip 14-iani nal. 19.30-21.30.