WWF issuaaginnartoq Krusep nassuerutigaa
Qilalukkanik qernertanik aarrinillu piniarneq piujuaannartitsinissaq tunngavigalugu ingerlanneqarunnaarsimasoq, pinngortitaleriffiup qanittukkut saqqummiuppaa. WWF tassannga issuaammat, sakkortuumik qisuariarfigineqarpoq.
Suliniaqatigiiffiup nunarsuarmi tamarmi ilaasortaqartup taama saqqummiussinera Nunarput nunarsuup sinnerani tusaamanerlunneqalersinnaasoq, aalisarnermut oqaaseqartoq isumaqarpoq.
Kruse: WWF qanimut misissueqqaarli
- Issuaaneriinnaagaluarpalluunniit WWF-ip immikkoortortaata Nunatsinni taamatut oqariartuuteqaqattaarnera, WWF-ip nunarsuarmi nukittoorujussuartut inissisimanerani atornerlunneqarluni inuiaqatigiinnut annertoorujussuarmik tasisitsissutigineqarsinnaanera ernumanartuuvoq, Siumut aalisarnermut oqaaseqartuat Karl-Kristian Kruse oqarpoq.
Naak pinngortitaq pillugu nunarsuaq tamakkerlugu suliniaqatigiiffik, WWF, pinngortitaleriffiup nalunaarutaanik issuaaginnaraluartoq, piniariaatsit qanimut misissuiffigeqqaarnagit Nunatta killiffii avammut saqqummiussuuttariaqanngikkai, Karl-Kristian Kruse isumaqarpoq.
Aamma atuaruk WWF: Qilalukkat qernertat aarrillu piujuaannartitsinissaq tunngaviginagu piniagaapput
- Nunatsinninngaanniit avammut nittarsaassissagunik, Nunatsinni pissutsit, piviusumik namminneq tikillutik angallaviginiarligit, inooriaatsit piniartullu qanoq piniariaaseqarnerat tikillugit. Imaanngilaq piniartut ullut tamaasa toqoraasut.
Nunattali uumasoqassusaa WWF-ip ukkataraa, pinngortitaleriffiullu nalunaarusiaani atuarneqarsinnaavoq, Naalakkersuisut uumassusilinnik ilisimatuut 2013-2015-imi siunnersuinerannit amerlanernik pisassiisimasut.
Aamma atuaruk Pinngortitaleriffiup kisitsisaatai
Taavalu aamma pissatat nalunaarsukkanut ilanngunneqartanngimmata aaveqaannarlunilu qernertanik qilalugaqaannarnissaa ilisimatuut ernummatigaat.
Taamaakkaluartoq WWF aalisarnermut naalakkersuisumit aalisarnermullu oqaaseqartumit eqqunngitsunik nalunaaruteqarneragaavoq.
WWF-ip sattaasserneragaanini tupigusuutigaa
Aamma atuaruk WWF-ip saqqummiussinera mitalliineruneragaavoq
- Pinngortitaleriffiup saqqummiussaanni kisitsisinik tunngavilersuutinilluunniit atunngisaannik ataasinnguamilluunniit issuaanngilagut. Sattaaserneraaneq paatsoornermik tunngaveqarsimassaaq.
Kaare Winther Hansen WWF-imeersoq taama oqarpoq.
Aalisarnermulli naalakkersuisoq ilassinninneruvoq, WWF-ilu piniagassiisarnermut suleriaatsit agguaasseriaatsillu pillugit nassuiaanniarlugu qaaqqullugu.
-Nikolaj Jeremiassenip nassuiaaniarluni qaaqqusiniarnera qujarutissaqaara. WWF-ip Inatsisartut aalisarnermut ataatsimiisitaliaat suliaq pillugu aamma eqqartueqatigerusuppaa, WWF-imeersoq Kaare Winther Hansen allappoq.
