ALLAATIGISAQ WWF: Folketingimut qinersinermut atatillugu kissaatit
Nunatta Folketingimut ilaasortaatitassaannut marluusunut KNR-ip peqatigiiffiit kattuffiillu assigiinngitsut qinnuigisimavai taakkununnga allagaqaqqullugit. Tassani Folketingimi suliassatut pingaartinnerpaasaat allaasereqquneqarlutik.
Danskit politikerii suliniaqatigiiffiillu suleqatigineqarput Bruxellesimilu EU-llu sinnerani isumaqatissarsiornikkut isummanik allanngortitsinissaq aamma iluatsinneqarluni. Aqqulli suli takivoq, taamaammat suliaq taanna ingerlatiinnarneqassaaq.
Kalaallit Nunaata puisit amiinik avammut nioqquteqarneranuinnaq pingaaruteqaannarani aamma nunarsuarmioqatigiit sinnerisa Kalaallit Nunaanni pissutsit piniartutullu kultureqarnerup ilisimasaqarfiginerulernissaata qanoq pingaaruteqartigineranik ersersitsivoq.
Nunarsuarmioqatigiimmi sinnerisa ilisimasaat killeqarmata Kalaallit Nunaannut akornutaasinnaasunik siunissami allatigut pisoqarsinnaavoq. Taamaammat kalaallit folketingimut ilaasortaatitaasa eqeersimaartuunissaat, nunani tamalaani suliani peqataasinnaassuseqarnissaat aammalu Kalaallit Nunaata Issittullu sinnerata aallartitaattut atuuffeqarnissaat pingaaruteqarpoq.
Namminersorneq pillugu isumaqatigiissut Kalaallit Nunaannut pitsaalluinnartumik pissarsissutigineqarpoq kalaallillu politikerii tamatuminnga isumaqatigiinniaqataasut pitsaalluinnartumik naammassivaat. Ajoraluartumilli kingornatigut paasinarsivoq ataatsimoortumik tapiissutit aalajangersimasunngortinneqarneri Kalaallit Nunaata aningaasaqarneranut pitsaanngitsumik sunniuteqartoq.
Namminersorneq pillugu isumaqatigiissutip isumaqatigiinniutigeqqinneqarnissaa kissaatigineqanngippat - aammami tamanna nalorninartoqarpallaassammat - taava danskit tapiissutigisartagaasa ikiliartuinnartut Kalaallit Nunaanni atugarissaarnermut ilinniartitaanikkullu aaqqissuussinermut kingunerlutsitsinnginnissaannut aqqutissanik allanik nassaarniartoqartariaqarpoq.
Taamaammat folketingimut ilaasortanngorumaartussat suliniutissanik ilusilersuisariaqarput namminiilivinnissap tungaanut Danmarkip kinguneqartussamik siunissarlu ungasinnerusoq eqqarsaatigalugulu tunniussaqarnissaanik periarfissaqartillugu. Tamannalu inuussutissarsiutinik ingerlatallit, soraarnerussutisiaqalernissamut aningaasaateqarfiit, ilinniartoqarfiit assingisaallu suleqatiginerisigut ilaatigut pisinnaavoq.
Kiisalu issittumi avatangiisit illersorneqarnissaat aammalu silap pissusianut pinngortitamullu tunngatillugu anguniakkat isummersoqatigiiffinni Naalagaaffeqatigiit oqaasissaqaqataaffigisaanni qulakkeerniarnissaat kalaallinut folketingimut ilaasortanngorumaartussanut pingaaruteqarput.
