Waterboardingip atuutileqqinnissaa CIA-p pisortaata akerleraa
Waterboarding atorlugu killisiunermi paarnaarussaq qilersorneqartarpoq, kiinnaalu annoraaminermik asseriarlugu imermik kuerarlugu, taamaalillunilu imeq oriarsinnaajunnaartillugu, ipisutullu misigitillugu.
Waterboarding naalliutsitsinertut amerlasuunit nalilerneqartarpoq.
- Periaatsit taamaattut akuererusunngilakka, nutaarsiassaqartitsivik dpa naapertorlugu, John Brennan NBC Newsimut ullumi ataasinngornermi oqarpoq.
Georg W. Buship USA-mi præsidentiunerani Waterboarding peqqarniisaarnianut akiuunnermi atorneqarsinnaatitaavoq.
Barack Obamalli 2009-mi præsidentinngornermini Waterboarding, naalliutstsinerillu allat, inerteqqutinngortippai.
Republikanerit sinnerlugit præsidentinngorniunnissamut sassartussatut qineqqusaartup, Donald Trumpip ilaatigut waterboarding atorsinnaatileqqinniarlugu qineqqusaarnermini arlaleriarlugu oqaatigaa.
Trumpimmi naalliutsitsinerit iluaqutaasinnaasorai.
- Oqarfiginanga iluaqutaanngitsoq. Naalliutsitsinerit iluaqutaasinnaapput, Donald Trumpip februarimi oqaatigaa.
