Washingtonimi nittarsaassineq ammarpoq
Kalaallit kulturikkut katerisimaartitsinerat Washingtonimi ingerlanneqartoq ullumi aallartippoq. Kalaallit amerikamiullu ataatsimiittartoqatigiivisa Joint Committeep USA-mi illoqarfiit pingaarnersaanni ataatsimiinneranut atatillugu nunatsinnik nittarsaassineq ingerlanneqarpoq.
Katersugaasivissuarmi Museum of Natural Historymi, nunarsuarmioqatigiit akornanni tusaamasaasumi kalaallit eqqumiitsuliaannik saqqummersitsinerit sisamat ammarneqartussaapput.
Saqqummersitsinerit amerikamiunit takuneqarsinnaasut ilaatigut tassaapput kalaallit nalitsinni eqqumiitsuliortuisa suliaat, assiliisup Ivars Silisip assilisaminik saqqummersitai kiisalu amerikamiup qalipaasup William Bradfordip nunatsinni assilisaanit saqqummersitat 1869-imeersut.
Eqqumiitsuliortut nunatsinneersut sanaluttarfiannik pilersitsisoqarsimavoq qajartortartullu Maligiaq Padillap sapaatip akunnerata naanerani ammaanersiorfiusumi qaanniornissani pilersaarutigaa.
Aamma isiginnaartitsisartoq Makka Kleist kalaallisut oqaluttuatoqqanik oqaluttuassaaq uaajiissallunilu.
Amerikamiullu aliikkutassaasa ilagaat tunumiutut iverneq kiisalu Avaakkormiut erinarsoqatigiivisa tusarnaartitsinissaat.
Avaakkormiut Washingtonimeereerunik New Yorkimut ingerlaqqissapput tassani Naalagaaffiit Peqatigiit ataatsimeersuarneranni nunap inoqqaavisa ataatsimiinneranni tusarnaartitsissallutik.
