Vivian Motzfeldtip Pituffimmut isumaqatigiissut naammagisimaarallarpaa
Suliffeqarfiup Inuksuk A/S-ip Pituffimmi 2023-mit ukiuni aqqaneq-marlunni kiffartuussinissamut isumaqatigiissuteqarfigineqarnera nutaarsiassatsialaavoq.
Nunanut allanut tunngasunut naalakkersuisoq, Vivian Motzfeldt (S), KNR-imut oqarpoq.
- Tassa isumaqarpunga isumaqatigiissut ullumikkut naammassineqarsimasoq, tassa 2020-mi naalakkersuisuusut piumasaqaataat naapertorlugit naammassineqarsimasoq.
Taassuma Mette Frederiksenip naalakkersuisuutitarisimasai kiffartuussinissamut isumaqatigiissutinik suliariumannittussarsiuussinermi tunngaviit pillugit nunarput sinnerlugu USA-mut isumaqatigiinniarput.
Suliaq Pituffimmi kiffartuussinissamik isuamaqagigiissummut tunngasoq 2014-imi aallartippoq.
Taamani sullissinissamik isumaqatigiissut USA-p amerikamiunut Vectrus Servicesimut tunniuppaa.
Taassuma tungaanut isumaqatigiiissut ukiorpassuarmi danskinit-kalaallinit tigummineqarpoq. Isumaqatigiissut ukiumut 200 milliuunit koruunit missaannik nunatta karsianut isertitsissutaasarpoq.
Kisianni illersornissamut isumaqatigiissut naapertorlugu kiffartuussinissamik isumaqatigiissut suliffeqarfimmut danskit/kalaallit pigisaannut tunniunneqartussaavoq.
Taamaattumik 2014-mi Vectrus Servicesimut isumaqatigiissuteqarneq Kunngeqarfiup USA-llu akornanni . isumaqatigiissummut naapertuutinngitsutut Kunngeqarfimmit nalilerneqarpoq.
Vectrus Servicesimik isumaqatigiissut 2024-p tungaanut atuuppoq.
Nunatsinnimi illersornissamut oqartussaaffik danskinit suli akisussaaffigineqarmat taakku tamanna isumagaat.
- Taamaammat piumasaqaatit taamani tunniunneqartut aallaavigalugit amerikamiut qallunaallu Kalaallit peqatigalugit isumaqatiginninniarnerit taamatut inaarfeqarmat isumaqarpunga nuannaarutissaasoq, Vivian Motzfeldt oqarpoq.
Akileraartarnermut oqartussat isumaginnissinnaasut
Inuksuk A/S ingerlatseqatigiiffiuvoq, nunatsinni nalunaarsorneqarsimasoq, taanna ingerlatseqatigiiffinnit marlunnit pigineqarpoq, tassa amerikamiut suliffeqarfiata, Vectrus Service Greenland Aps-ip ullumikkut Pituffimmi kiffartuussinissamik isumaqatigiissuteqartup 49 procentia pigaa.
Inuksummut piginneqataassutsip sinnera 51 procentiusoq kalaallit suliffeqarfiannit Permagreen Greenland A/S-imit pigineqarpoq. Suliffeqarfiup nunatsinni sanaartugassarpassuit suliarisarpai nunatsinnilu siulersuisoqarluni. Tassanilu danskit sanaartugassanik suliassinneqartartut Per Aarsleff pingaarnertut piginnittuuvoq.
Suliffeqarfiup nunatsinniinnissaa siulersuisuisalu nunatsinniinnissaat Naalakkersuisut piumasaqaataasa ilagaat. Vivian Motzfeldtillu Inuksummik toqqaanermi piumasaqaatit malinneqartut oqaatigaa.
- Tassa ima oqariartuuteqarpoq, ingerlatseqatigiiffik maani nunatsinni angerlarsimaffeqassasoq, taannalu aamma massakkut isumaqatigiissutip naammassinerani naaperiarneqarsimavoq, Motzfeldt oqarpoq.
Dansk Institut for Internationale Studierimi (DIIS) ilisimatuunerup Issittorlu pillugu ilisimatuup, Ultik Pram Gadip oqarnera naapertorlugu ingerlatseqatigiiffiup Inuksuk A/S-ip nunanit allamiunit pigineqarluni nunatsinneersuunissamut piumasaqaatit ilumut malinnerai apeqqusissallugu soqutiginarpoq.
AAMMA ATUARUK Ilisimatooq: Pituffimmi isumaqatigiissutit iluanaarutaanissaat kalaallit namminneq akisussaaffigaat
Ingerlatseqatigiiffiummi sinneqartoorutaasa ilaat qanoq annertutigisut nunatta karsianut tuttarnissaannik qulakkeerinissaq ajornakusoorsinnaavoq.
Vivian Motzfeldtilli nunatsinni Akileraartarnermut oqartussaaffiup nakkutiginnilluarnissaa naatsorsuutigaa.
- Akileraartarnermut aqutsisoqarfiup nunatsinni akileraartarnemik nakkutiginnittuuvoq. Aamma naatsorsuutigaara qulequttami uani nunarput sinnerlugu suliassatik naammassissagaat. Taamaattoqanngippat aamma malittarinneqqissaarneq, taamatuma naammassinissaanut Naalakkersuisut suleqataassapput. isumaqarpunga tamanna oqaatigissallugu pingaaruteqartoq.
Inuksuup Pituffimmi sakkutooqarfimmi kiffartuussinermut atatillugu atorfinitsitaasa affaat sinnerlugit kalaaliunissaat aamma piumasaqaataasoq taassuma ilanngullugu oqaatigaa. Taakkulu siusinnerusumi piumasaqaataasimasunit amerlanerupput.
- Nunatsinni akileraarutit amerlasuut pineqarput, aammalu ilaqutariit imminut pilersornikkut suliffeqarsinnaanerat pineqarput. Aammalu ilinniartitaanikkut praktikkerfissat, kiffartuussinerup iluani piginnaasatigut qaffassaanerit aamma inuiaqatigiit iluaqutissaat isumaqatigiissummi uani pineqarput, Vivian Motzfeldt oqarpoq.
Nunarput siunissami nammineq isumaqatigiinniartalissasoq
Pituffimmi kiffartuussinissamut isumaqatigiissutit aaqqiagiinngissutaanerat 2015-imi aallartippoq, USA-mmi ingerlatseqatigiiffik Vectrus Service A/S iluarsartuussinissamut tamakkiisumik amerikamiullu sakkutooqarfiani kiffartuussinissamut isumaqatigiissuteqarfigaa.
Tamanna pivoq naak nunatta Danmarkillu akornanni illersornissamut isumaqatigiissummi kiffartuussinissamut isumaqatigiissut danskit/kalaallillu ingerlatseqatigiiffiannut tunniunneqarnissaa oqaatigineqaraluartoq. Ingerlatseqatigiiffik Greenland Contractors Namminersorlutik Oqartussat piginneqataaffigisaat ukiut 40-t sinnerlugit kiffartuussinermik isumaqatigiissuteqarfigineqartarpoq.
Amerikamiut ingerlatseqatigiiffiannik toqqaaneq Danmarkip aamma nunatta akornanni illuatungaanilu USA-mik ukiorpassuarni isumaqatigiinniarnermik kinguneqarpoq.
Ingerlatseqatigiiffiup Pituffimmi kiffartuussiniaruni piumasaqaatit suut malissanerai pillugu nutaanik malittarisassiortoqarnissaa illuatungeriit 2020-mi isumaqatigiissutigaat. Isumaqatigiinniarnerit nunatta Danmarkillu akornanni qanimut ataqatigiissaarikkut ingerlanneqarput, isumaqatigiinniarnerilli Danmarkimit tassa nunatsinni nunanut allanut tunngasunut illersornissamullu oqartussaasumit ingerlanneqarlutik.
Vivian Motzfeldtip oqarnera naapertorlugu isumaqatigiissut nutaaq nunatsinnut pitsaasuuvoq. Taassumali Pituffimmi kiffartuussinissamut isumaqatigiissutit tulliani suliariumannittussarsiuunneqarnissaanut nunatta USA-mut nammineq isumaqatigiinniarsinnaalernissaa neriuutigaa.
- Isumaqatigiinniarnerup tullissaanut suliassarpassuusut isumaqarpunga. Inatsisinut tunngatillugu malittarisassaqanngilagut. Tamanna oqartussaaffiginngilarput. Taamaammat isumaqatigiinniarnerit danskit amerikamiullu inatsisaat malillugit ingerlanneqarput. Taamaammat inatsiseqarnermut oqartussaaffiup akisussaaffigilernissaa tullissaanimut suliassaavoq pingaaruteqartoq, Vivian Motzfeldt oqarpoq.
