Vittus: Pituffik pillugu suliaq toqqissisimanarunnaarpoq
- Tusagassiutit aqqutigalugit ullumi paasivara danskit nunanut allanut ministeriaqarfiat juulimi 2014-mi immikkut USA-mik oqaloqateqartarsimasut, tassanilu danskit kalaallillu ataatsimut suliffeqarfiisa qinnuteqarsinnaanerannik akuersissuteqartarnermut Kalaallit Nunaat akuutinneqarsimanngitsoq.
Vittus Qujaukitsoq allappoq imalu nangilluni.
- Danskit nunanut allanut ministeriat ullumi sivikitsumik ataatsimeeqatigaara, aammalu paasissutissat nutaat tupaallaatigisimallugit oqaatigalugu. Paasissutissat nutaat toqqammavigalugit killiffik toqqissisimanartinngilara, Qujaukitsoq allappoq imalu nangeqqilluni.
- Nunanut allanut ministerip erseqqissaatigaa, Danmarkip USA-llu akornanni, Kalaallit Nunaat akuutinnagu immikkut oqaloqatigiittoqartarsimanera pillugu suliaq qulaajaaffigitilersimallugu, Vittus Qujaukitsoq tusagassiuutinut nalunaarummi allappoq.
Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup danskit nunanut allanut ministeriat paaseqatigalugu februaarip 23-iani 2015-mi amerikamiut nunanut allanut ministeriaqarfiat aammalu illersornissamut ministeriaqarfiat ataatsimeeqatigai.
Vittus Qujaukitsup Inatsisartut Nunanut Allanut Sillimaniarnermullu Ataatsimiititaliaat tallimanngornermi februaarip 27-iani 2015-mi ilisimatitsilluni ataatsimeeqateqassaaq, tassanilu suliap ineriartornera pillugu oqaloqatigiinnittoqassaaq.
