Vittus Nunatsinnit kissaatigineqartunik Stoltenbergimut ilisimatitsisoq

Naalagaaffiit NATO-mut ilaasortat politikkikkut qanoq inissisimaffeqarnersut paasissutissiissutiginissaa pingaartuusoq, nunanut allanut naalakkersuisoq, Vittus Qujaukitsoq Nunat Killiit Illersoqatigiiffiata qullersaanik Jens Stoltenbergimik sapaatip akunnerata siuliani ataatsemeeqateqartoq oqarpoq.
Allattoq Ivik Kristiansen
decembarip 06-at 2016 13:43

Ilaatigut USA-p nutaamik præsidenteqalernissaa, Tuluit Nunaata EU-mit ilaasortaajunnaarnissaa Tyrkiap politikkikkut ineriartornera Nunat Killiit Illersoqatigiiffiannut nalorninartorsiortitsipput.

Taamaammat naalagaaffiit illersoqatigiiffimmut ilaasortat politikkikkut qanoq inissisimaffeqarnersut paasissutissiissutiginissaa pingaartuusoq, nunanut allanut naalakkersuisoq, Vittus Qujaukitsoq Nunat Killiit Illersoqatigiiffiata, NATO-p, qullersaanik, Jens Stoltenbergimik sapaatip akunnerata siuliani ataatsemeeqateqartoq oqarpoq.

- NATO-p qullersaata nunat ilaasortaasut ataatsimeeqatigisarpai. Taamatullu aamma NATO-mi nunanut allanut ministerit aammalu illersornissamut ministerit naaffeqartumik aamma ataatsimiisinneqartarnerannut taamaasillutik nunani ataasiakkaanut unammilligassat suunersut ilisimanissaat pingaartutut isigisariaqarpoq, Vittus Qujaukitsoq oqarpoq.

AAMMA ATUARUK Vittus Qujaukitsoq issittoq pillugu ataatsimeersuarnermi pingaarnertut oqalugiartuussasoq

Illersornissamik isumaqatigiissummit pissarsiaqarnerorusuttoq

Taassuma ilaatigut Camp Century, mingutsitsineq, Pituffik illersornissamullu isumaqatigiissut Nunat Killiit Illersoqatigiiffiata qullersaanut ataatsimeeqateqarnermini oqaluuserai.

Nunattalu illersornissamut isumaqatigiissummit pissarsiaqarnerunissaa, Vittus Qujaukitsup pingaartippaa.

- Naliginnaasumillu USA-p Nunatsinniinnera pillugu Nunatta annertunerusumik agguagarsisinneqartalernissaa pillugu Inatsisartut ataatsimoortut piumasaateqarnerat ersarissumik apuupparput, Vittus Qujaukitsoq oqarpoq.

NATO toqqaannartumik iliuuseqarsinnaanngitsoq

Nunatsinni pissutsit Nunat Killiit Illersoqatigiiffianut paasissutissiissutiginissaat pingaaruteqarsorigaluarlugit ataatsimeeqatigiinnerup pissutsinik allannguinissaa Vittus Qujaukitsup naatsorsuutiginngilaa.

- NATO toqqaannartumik iliuuseqarsinnaanngilaq, illersornissakkummi suleqatigiiffiuvoq, nunanut allanut naalakkersuisoq, Vittus Qujaukitsoq oqarpoq.

Ministeri allanik oqaluuserisaqarniartoq

Aamma danskit nunanut allanut tunngasunut ministeriata, Anders Samuelsenip, Jens Stoltenberg ataatsimeeqatigisussaavaa. Nunatsinnili pissutsit oqaluuserineqassanngitsut, nunanut allanut tunngasunut ministereqarfimmit e-mailikkut nalunaarutigineqarpoq.

Nunat Nunat Killiit Illersoqatigiiffianut ilaasortaasa nunanut allanut tunngasunut ministerii aqagu aqaguagulu ataatsimiissapput.