Vittus: mamakujuttunut akitsuummut aaqqiissuteqartoqangajalerpoq
Maannali akitsuutinut assortuussutaaqisunut allannguutissatut siunnersuumik aningaasanut naalakkersuisoq suliaqartoq Sermitsiaq ullumi saqqummersoq allappoq:
- Piffissami kingullermi inatsisissatut siunnersuut pillugu annertuumik oqallinnerup, Inatsisartuni amerlanerussuteqartut siusinnersukkut aalajangiussaminnik allanngortitserusunnermik kissaateqarnersut pillugu Naalakkersuisut eqqarsaatersuuteqalersippai, Aningaasanut Naalakkersuisoq Vittus Qujaukitsoq oqarpoq, Sermitsallu allaaserinninnera naapertorlugu taanna maanna mamakujunnut akitsuut pillugu allannguutissatut siunnersuummik suliaqaleruttorpoq.
Aamma atuaruk Aningaasaqarnermut ataatsimiititaliap Naalakkersuisut isornartorsiorai
Mamakujuttunut, tupanut pujoqanngitsunut qummoroortartunullu akitsuutit qaffanneqarnerat siorna kingumoortumik 20. August aallarnerfigalugu atuutilersinneqarpoq.
Tamanna ilaatigut Sulisitsisunit, SIK-mit pisiniarfiutilinillu sakkortuumik isornartorsiorneqarpoq.
Ilaatigut pisiniarfiit minnerusut inatsit “uukapaatitsiniutitut” taagorpaat. Aningaasaqarnermutttaaq Ataatsimiititaliaq isornartorsiuivoq, Naalakkersuisullu nassuiaateqarnissaat kissaatigalugu.
Naalakkersuisut Inatsisartut upernaanerani ataatsimiinnisaanni aaqqissutissatut siunnersuummik saqqummiinissaat naatsorsuutigalugu Vittus Qujaakitsoq oqarpoq.
- Imarisassarpiaa massakkut misissorneqaleruttorpoq, taamaammallu taanna erseqqinnerusumik tikissinnaanngilara, Vittus Qujaukitsoq Aviisimut oqarpoq.
Inatsisinillu allannguit inuusutissarsiortut ilaasa Nunatta Karsianit toqqaannartumik tapiissutisinerannut assigusumik pissarsisinnaanerat taassuma erseqqissaatigaa.
- Tamannalu naapertuunnersoq oqallisigineqarsinnaavoq. Ajornartorsiullu taanna misissuinernut maanna ingerlanneqartunut ilaatinneqarpoq, Vittus Qujaukitsoq oqarpoq.
Aamma atuaruk Amerlanerussuteqartut akitsuutit akerleraat
Qujaukitsup oqarnera naapertorlugu pisiniarfiit akitsuutinik kingumut atuutilersunik akinik qaffaanermikkut matussusiisimanissaat “annertuumik ilimanaateqarmat” pissutsit taalisinnaapput.
Taamatulli eqqarsarneq Sulisitsisuni siunnersortip Lars Krogsgaard-Jensenip sussarinngilaa.
- Naalakkersuisut taamatut eqqarsaatersornissamut toqqammavissaqanngillat. Taamatut oqaaseqarneq misissuinermik toqqammaveqartariaqartoq, siunnersorti Sermitsiamut erseqqissaavoq.
Aamma atuaruk Sukkulaatinut, neqinut tupanullu akitsuut qaffanneqalerput